Мал аж ахуйн салбарын цаг үеийн байдлаар нийт нутгийн 50 хувьд бэлчээрийн ургамлын гарц сайн, 40 хувьд тааруу, 10 хувьд муу байгаа аж. Хадлан бэлтгэлд хадуур, тармуур бүхий 5529 дугуйт трактор,  1100 морин хадуур, тармуур, 15000 гар болон хөдөлгөөнт хадуур, 470 хаман боогч ажиллаж байна. Хадлан бэлтгэлийн техник, тоног төхөөрөмжийн хангамжийг нэмэгдүүлэх зорилгоор газар тариалан, хадлангийн зориулалттай бага оврын тракторын зээлийн нөхцөлийг хөнгөлж, хугацааг уртасгаснаас 8 дугаар сард 1000 ш трактор борлуулагдаад байгаа аж.  

Хадлан, тэжээл бэлтгэл улсын хэмжээнд өвөлжих, хаваржих малд шаардлагатай 1.2 сая тн өвс, 150.0 мянган тн үйлдвэрийн болон гар тэжээл, ногоон тэжээл, 94.0 мянган тн давс, хужир бэлтгэх шаардлагатай аж. Малчдын түвшинд өвс, хадлан 286.5 мянган тн буюу 24.3 хувь, гар тэжээл 4.9 мянган тн буюу 11 хувьтай бэлтгэгдээд байна. Харинаймаг, сумын аюулгүйн нөөцөд бэлтгэвэл зохих үүрэг даалгавар одоогийн байдлаар өвс 3010.5 тн буву 10.2 хувьтай, тэжээл 279.9 тн буюу 2.5 хувьтай байна.

Энэ намрын ургацын урьдчилан балансаас тооцоход гурилын үйлдвэрүүдэд шилжиж буй улаанбуудайнаас 58.0 мянган тн хивэг, 12.6 мянган тн багсармал тэжээл, тариалалтаас 53.0 мянган тн ногоон тэжээл нийлүүлэгдэхээр байгаа нь малын хүчит тэжээлийн дотоодын хэрэглээг хангах боломжтойг харуулж байна.

Засгийн газрын тогтоолоор зөвшөөрөгдсөн 635.0 мянган га талбайд Төв, Сэлэнгэ, Дархан-Уул, Булган, Архангай аймгуудаас Дорнод аймагт 60 гаруй, Сүхбаатар аймагт 50 гаруй, Хэнтий аймагт 20 гаруй хадлангийн салаа гэрээний дагуу ажиллаж Сүхбаатарт 1536 тн хадлан, Дорнодод 5600 тн, Хэнтийд 1000 тн хадлан бэлтгээд байгаа юм байна.

П.Наран