Унгарын дүрвэгсдийн хуарангаас олон мянган дүрвэгч зугтахыг оролцож, цагдаа нартай мөргөлдсөн билээ. Энэ үеэр Унгарын “N1” телевизийн зураглаач Петра Ласзло гэгч хүүгээ тэврээд гүйж буй дүрвэгчийг санаатай дэгээдэж унагаасан юм. Зураглаач бүсгүйг дүрвэгсдийг түлхэн унагааж буй бичлэгийг өөр нэгэн хэвлэлийн зураглаач авч, өөрийн твиттертээ байршуулжээ.

Энэхүү бичлэг интернэт ертөнцөд түймэр мэт газар авсан бөгөөд “N1” телевиз дүрвэгчидтэй хэрцгий хандсан ажилтнаа халсан тухайгаа фэйсбүүкээрээ дамжуулан мэдэгдсэн юм.

Өөрийн алдаанаас болж ажилгүй, нэр хүндгүй болсон зураглаач бүсгүй твиттерийн тусламжтай аав, хүү хоёроос уучлалт гуйсан тухай “www.dailymail.co.uk” мэдээллээ. Тэрбээр “Намайг уучлаарай. Би ёсгүй алдаа гаргажээ” гэж жиргэжээ.  Зураглаач ямар шалтгаанаар аав, хүү хоёрыг түлхэн унагааснаа хэлэхээс татгалзсан ч “Намайг үзэн ядах хэрэггүй” гэж хэлжээ.

Б.Дэлгэрцэцэг