Монгол Улсад байнгын ажиллагаатай парламент үүсэн байгуулагдсаны 25 жилийн ой тохиож байгаа. Ойн хүндэтгэлийн чуулган өнөөдөр хуралдаж байна. Хуралдаанд Монгол Улсын Ерөнхийлөгч, УИХ-ын гишүүд, Улсын бага хурал, үе үеийн парламентын төлөөлөгчид оролцож байгаа юм. Хүндэтгэлийн чуулганыг УИХ-ын дарга З.Энхболд нээж үг хэлсэн юм. Дараагаар нь Монгол Улсын Ерөнхийлөгч үг хэллээ. Монгол Улсын Ерөнхийлөгч хэлсэн үгэндээ 25 жилийн өмнө улсын бага хурлын талаар дурдаж, дурсамж сөхөж, өнөөдрийн улс төрчдийн хариуцлагын талаар ч хөндсөн юм. Тэрбээр:
-Хариуцлагатай, ёсзүйтэй улстөртэй болъё. Хариуцлага дээрээсээ эхлэх ёстой. Энэ ажлыг хийхгүй бол, эхлүүлэхгүй бол болохгүй нь. Ялангуяа хариуцлага бол төрийн өндөр албан тушаал хашиж байгаа хүний хувьд ёсзүй юм. Ёсзүйн хариуцлагыг сонгогчдынхоо өмнө хүлээсэн улстөрч өнөөдөр харагдахгүй байна. Улсын бага хурлын гишүүн ёсзүйтэй байсан 160 төгрөгийн зүйл худалдаж авсны төлөө Улсын бага хурлын гишүүнээс чөлөөлөгдөж байсан. Улсын мөнгөнөөс найман төгрөг илүү зарцуулсан бол цалингаасаа төлдөг байсан гэж Чимид гуай хэлдэг байлаа. Өнөөдөр тийм ёсзүйтэй хүн алга. Өнөөдөр Улс төрийн хариуцлагатай, иргэний хариуцлагатай байх ёстой. Өнөөдөр та бүхэн юу ч гэж амлаад ард түмэн хүлээж авахааргүй болсон. Ард түмний халуун итгэл байхгүй болсон. Хариуцлагатай байдал нь өөрөө тууштай итгэлтэй байдлыг бий болгодог гэлээ.
Хүндэтгэлийн чуулган үргэлжилж байна.
Н.Энх
Уншиж байна |