Хуульзүйн байнгын хороо гишүүдийн 79.8 хувийн ирцтэйгээр хуралдлаа. Хуралдаанаар Өршөөлийн хуульд тавьсан Ерөнхийлөгчийн хоригийг хүлээж авах эсэхийг хэлэлцсэн юм. Өмнөх хуралдаанаар “Шударга ёс” эвслийн бүлэг таван хоногийн завсарлага авсан байлаа. Завсарлагын хугацаа дуусгавар болсонтой холбогдуулан тус бүлгийн дэд дарга З.Баянсэлэнгэ санал хэлсэн юм. Тэрбээр:
-Өнөөдөр нийгэмд үүсээд байгаа улстөржилт, АТГ-аас хэвлэл мэдээлэлд ярьсан 350 тэрбум төгрөгийн хохирол бүхий 114 холбогдогчийн асуудлыг энэ үеэр хэлэлцэх ёстой. Бид үнэн бодит мэдээллийг өгөх ёстой. АТГ хэрэг бүртгэл, мөрдөн байцаалтын шатанд яваа хэргийг мэдээлдэг байр суурь тогтсон учраас манай бүлэг завсарлага авсан. Хоригийг хүлээгээд авсан тохиолдолд ял эдэлж байгаа, мөрдөн байцаалтын шатанд явж байгаа хүмүүсийн асуудал бүрэн зогсоно. Завсарлагааны хугацаанд Хуульзүйн байнгын хороонд албан бичиг ирсэн байх. 114 холбогдогчтой мэдээллээ АТГ эхэнд нь мэдээлэх хэрэгтэй. Парламентын 76 гишүүн энэ холбогдогч дотор байгаа юу. Өмнөх байнгын хороон дээр хоёр УИХ-ын гишүүний нэр гарсан гэлээ. Үүний дараагаар УИХ-ын гишүүн Ц.Нямдорж горимын санал гаргалаа. УИХ-ын гишүүн Ц.Нямдорж:
-Миний мэдэхийн 1981 оноос хойш ордон дотор мөрдөн байцаалтын шатанд байгаа хэргийг ярьдаг зүйл болоогүй юм. Үүнээс хойш 30 гаруй жил болж байна. Улс төрийн товчоо байх үед ч хэргийг ярьдаггүй байсан. Одоо баахан хүмүүсийг хэрэгт татах нь. Шалгагдаж байгаа асуудал нь буруутай ч юм билүү, үгүй ч юм билүү. Хуулийн байгууллагад шалгагдаж байгаа гэдэг нэр сонсчихоод тэр хүний үр хүүхэд сургууль дээрээ ямар сэтгэгдэлтэй байна гэж бодож байна. Энэ бүхнийг та нар бодолцох ёстой. Хэрэг бүртгэл, мөрдөн байцаахаас бусад асуудлаар цагдаагийн байгууллагыг Засгийн газар цагдааагийн байгууллагыг удирдана гэсэн заалт Засгийн газрын хуульд байгаа. Хуулийн бүх заалтыг уландаа гишгэж, шалгагдаж байгаа хэргүүдийн талаар олон нийтэд цацах нь л дээ. Энэ арай дэндэж байна. Хуулийн байгууллагын ажилд эрээ цээргүй оролцдог асуудлаа УИХ зогсоомоор байна, З.Энхболд дарга аа. Энэ УИХ чинь төв хорооноос долоон дор боллоо. Өнөөдөр Өршөөлд хамрагдах ёстой хүмүүсээс захиргааны хэрэгт холбогдсон хэсэг нь өршөөгдсөн. Хууль бусаар мянга мянгаар нь хорьдог асуудал гарч байгаагүй юм. Холбогдох хүмүүст нь үүнийг хэлсэн. Тиймээс элдэв хэргийн талаар хууль бусаар асуудгаа зогсоох хэрэгтэй гэсэн горимын санал гаргаж байна. Хуульч мэргэжилтэй эрхмүүд миний саналыг дэмжих биз. Ядаж л мэргэжилдээ үнэнч байх хэрэгтэй. Өнөөдөр энд зарладаг, сүүлд нь шүүхээр гэм зэмгүй бол цайрвал тэр хүмүүсийн гэр бүлд учирч байгаа асар их сэтгэл санааны дарамтыг хэн хариуцах юм. Гишүүд танилцуулгыг нууцаар үзээд өгдөг юм байгаа биз. Хуульчдын нурууг авах гэж улаан цайм улстөржиж зүтгэдэг боллоо. Хэлмэгдээд байгаа бол шүүхээр яваад цагаатгуул л даа. Хуульчид яаж ажлаа хийх юм. Хэрэг төвөгт холбогдсон хүмүүс нь баахан дарамтална, улстөрчид нь дарамтална. Энэ төрд цаашдаа яаж зүтгэх юм бэ. Үүнийг би бүх гишүүдэд хамаатуулаад хэлж байгаа юм биш. Хуулийн байгууллага ямар хүнд дарамт, шахалтад ажилладгийг та бүхэн мэдэж байгаа гэлээ.
Гишүүд Ц.Нямдорж гишүүний гаргасан горимын саналыг дэмжсэн бол АТГ-ын дэд дарга “АТГ-т 350 тэрбум төгрөг биш 32 тэрбум 240 сая төгрөгт холбогдох хэргийг шалгаж байгаа” хэмээн З.Баянсэлэнгэ гишүүний асуултад хариулсан юм. Харин гишүүн З.Баянсэлэнгэ “Мөрдөгдөж байгаа хэрэгт улстөрчид нөлөөлж чадахгүй байгаа. Ерөнхийлөгч нөлөөлж байна. Прокурор дээр очоод хэлж байна гэдэг чинь нөлөөлж байгаа гэсэн үг хэмээлээ.
Үүний дараагаар Ерөнхийлөгчийн тавьсан хоригийг хүлээж авах асуудлаар санал хураалт явуулсан юм. Байнгын хорооны хуралдаанд оролцсон гишүүдийн 68,4 хувийн саналаар Өршөөл үзүүлэх хуульд тавьсан Ерөнхийлөгчийн хоригийг хүлээж авахаар дэмжлээ.
Н.Энх