АНУ-ын Төрийн нарийн бичгийн дарга Жон Керри өчигдөр ОХУ-ын Гадаад хэргийн сайд Сергей Лавровтой утсаар ярилцахыг хүссэн боловч татгалзсан хариу авсан тухай “www.dailymail.co.uk” мэдээллээ. Керри Сирийн иргэний дайн болон “Халифын вант улс” бүлэглэлийн асуудлаар Лавровтай ярилцахыг хүсчээ.
Керри өчигдөр сэтгүүлчтэй уулзах үеэрээ “Оросын энэ үйлдэл иргэний дайныг улам даамжруулж, улмаар хэт даврагчдад сайхан боломж олгож байна. Сиричүүд эх орноосоо дүрвэн гарч байна. Орос, хэт даврагчтай тулалдах нь энгийн иргэдэд хэтэрхий аюултай. Сирийн газар нутагт хэдийнэ оросын техник, төхөөрөмжүүд нэвтэрсэн. Мөн тусгайгийнхан хүртэл нэвтэрч, хэт даврагчдад цохилт өгөхөөр төлөвлөж байна. Путин Ассадын эрх мэдлийг хүчирхэгжүүлэхийн тулд цэргээ Сирид нэвтрүүлсэн. Путин иргэний дайн дэгдсэний дараагаас Ассадыг дэмжиж, зэр зэвсгээр хангадаг байсан” гэж хэлжээ.
Өнгөрөгч долоо хоногт оросын сайн дурынхан 80 тонн хүмүүнлэгийн барааг Сирийн Латакиа хотноо авчирч, иргэдэд хуваарилж эхэлсэн билээ. Мөн тус улсын цэргийн шинжээчид, зөвлөхүүд Латакиа хотноо нисэх зурвас барьж эхэлсэн хэмээн Пентагон мэдээлсэн юм. Цагаан ордон Сирийн Ерөнхийлөгч Башар аль Ассадын төлөө оросууд тулалдаж байна хэмээн мэдээлж, нэн даруй цэргийн ажиллагаагаа зогсоохыг Москвагаас шаардсан. Нисэх зурвас байгуулах болон хүмүүнлэгийн бараа Сирид нийлүүлэх нь хууль ёсных хэмээн Москвагийн удирдлагууд мэдэгджээ.
Б.Дэлгэрцэцэг
Уншиж байна |