ОХУ-ын нийслэл Москва хотноо Израйлийн ерөнхий сайд Бенжамин Нетаньяху төрийн айлчлал хийхээр хүрэлцэн ирсэн тухай “Синьхуа” агентлаг мэдээллээ. Ерөнхий сайд албаны хүмүүсийн хамтаар Москвад ирсэн даруйдаа Ерөнхийлөгч В.Путинтэй уулзаж, цаг үеийн асуудлаар байр сууриа солилцжээ. Бенжамин Нетаньяхугийн хэвлэлийн төлөөлөгчийн мэдээлснээр “Ерөнхий сайд Ойрхи Дорнод болон Сирийн асуудлаар ярилцахаар Москва хотноо ирсэн” гэжээ.
Путин, Бенжамин нар сэтгүүлчдээс тусдаа уулзсан аж. Уулзалтын танхимд орчуулагчаас өөр хүн байгаагүй хэмээн орон нутгийн хэвлэлүүд онцолж байна. Тэд 54 минут, 12 секунд ярилцаж, 10 гаруй гэрээг үзэглэжээ.
Хамтарсан мэдэгдлийн үеэр Путин, Бенжаминд талархлаа илэрхийлж “Орос, Израйль улстай найрсаг харилцаатай байдаг. Хоёр улс бүхий л салбарт хамтран ажиллах боломжтой” гэсэн бол Ерөнхий сайд “Орос, Сирийн Засгийн газарт туслаж, цэргийн бааз барьж байгаа нь хямралыг улам даамжруулах эрсдэлтэй байна. Мөн Ираны цөмийн хөтөлбөр, Сирид хяналтаа тогтоохыг санаархаж буй хэт даврагчид Израйль улсад заналхийлж байна. Тиймээс Сири улсад үзүүлж буй тусламжаа зогсоохыг хүсье” гэж хэлжээ.
Путин “Сирийн тусгаар тогтнол, аюулгүй байдлын үүднээс туслалцаа үзүүлэхээр болсон. Сирид улсад зэвсэг нийлүүлэх нь Израйлийн аюулгүй байдалд сөргөөр нөлөөлөхгүй” гэсэн байна.
Б.Дэлгэрцэцэг
Уншиж байна |