Монгол Улсын Ерөнхийлөгч Ц.Элбэгдорж энэ сарын 25-27-ны өдрүүдэд Нью-Йорк хотноо болж буй “Тогтвортой хөгжлийн 2030 хөтөлбөр”-ийг батлах НҮБ-ын Дээд хэмжээний уулзалт болон НҮБ-ын Ерөнхий Ассамблейн 70 дугаар чуулганы Ерөнхий санал шүүмжлэлд оролцлоо.

Монгол Улсын Ерөнхийлөгч Ц.Элбэгдоржийн 2015 оноос хойшхи тогтвортой хөгжлийн хөтөлбөрийг батлах НҮБ-ын Дээд хэмжээний уулзалтад хэлсэн үгийг хүргэж байна.

Эрхэм дарга нар аа,

Ерөнхий нарийн бичгийн дарга аа,

Шинэ зууны эхэнд бид Мянганы хөгжлийн зорилтуудыг баталж, хэрэгжүүлж ирсэн. Бидэнд олон амжилт байгаа хэдий ч олон алдаа мөн бий. Гэхдээ дэлхийн хамтын нийгэмлэг сорилтоо чамлалтгүй давж чадсан. Бид бүгд олон сургамж авч, багагүй амжилтад хүрсэн.

НҮБ-ын Ерөнхий Ассамблей энэ удаа түүхэн баримт бичиг баталлаа. НҮБ-ын гишүүн 193 улс тогтвортой хөгжлийн төлөөх хөтөч зургаа тохиролцлоо. Хүн төрөлхтөн эдүгээ ирэх 15 жилийн улам бүр түгээмэл, зоримог төлөвлөгөөтэй боллоо.

Түгээмэл, бүх нийтийн ийм тохиролцоо өмнө нь хүн төрөлхтний түүхэнд байгаагүй.

Энэ нь цогц, тууштай гэдгээрээ онцгой. Нэн чухал зорилтууд, эдийн засаг, нийгмийн олон сорилтууд, хүрээлэн буй орчны тулгамдсан асуудлаа бид тодорхойлж тохиролцлоо.
 

Үүнийг бүтээж чадсан бүгдэд чин сэтгэлийн талархал илэрхийлье. Хичээнгүй, цаг наргүйгээр, уйгагүй зүтгэсэнд баярлалаа. Хүн төрөлхтний төлөө 2030 он хүртэлх түүхэн зорилтуудыг тодорхойлох асар өндөр үүргийг тэд үүрч чадлаа.

Түүний бүрэн хэрэгжилтийг хангах нь одоо гишүүн улс, бид бүхэнд оногдлоо.

Дарга нар аа,

Олон улстай хамтран ажиллах Монгол Улсын үүрэг амлалт тууштай хэвээр байна.

Энх тайван, хөгжлийг цогцлоох хамтын үүргээ бид биелүүлнэ.

Тогтвортой хөгжлийн зорилтуудын амжилт нь үр дүнтэй даян дэлхийн түншлэл, Засгийн газар хоорондын идэвхитэй харилцаа төдийгүй иргэний нийгэм, хувийн хэвшлийн уян хатан хамтын хүчин чармайлтаас хамаарна.

Эдийн засаг, нийгмээ хөгжүүлэх нь улс орон бүрийн суурь хариуцлага мөн гэдгийг тэмдэглэхийг хүсч байна. Гэхдээ бусдын дэмжлэг хэрэгтэй олон улс орон байгааг дэлхийн хамтын нийгэмлэг мөн мартах учиргүй.

Улс орон бүр сайн засаглал,  эрх зүйт ёс, хүний эрхийн зөв бодлогын төлөө байнга зүтгэх ёстой гэдэг нь тодорхой.  

Тогтвортой хөгжлийн эдгээр зорилтуудаа хэрэгжүүүлэхэд эрчимтэй, бүгдийг оролцуулсан, нээлттэй тогтолцоо бидэнд хэрэгтэй.  Найдвартай хэрэгжүүлэх, нягтлах, хариуцлагатайгаар зохицуулах хууль эрх зүйн орчин, тогтолцоог бид бүрдүүлэх ёстой.

Бид шударга байх ёстой гэж үзэж байна. Улс орон, засгийн газар бүр даян дэлхийн зорилтод өөрийн бололцоо, оногдох хариуцлагын түвшингээр идэвхитэй хувь нэмрээ оруулах ёстой.

Дарга нар аа,

Энх тайвныг дэмжих,

Хүний эрхийг дээдлэх,

Эдийн засаг, нийгмийн цогц хөгжлийн төлөө НҮБ-ыг байгуулсан үндсэн зорилгодоо хүрэхийн тулд бүх хүч чармайлтаа бид дайчлах хэрэгтэй.

XXI зуунд НҮБ бидний хүн төрөлхтний төвд хэвээр үлдэнэ гэдэгт итгэж байна.  

Баярлалаа.