Ирэх оны төсвийн маргааш өргөн барина. 2016 оны төсөвт дэд сайдгүй болон зарим яамдыг нэгтгэж, агентлагуудыг татан буулгахаар тусгасан байна. Төсвийн төсөлтэй холбогдуулан Сангийн сайд Б.Болороос зарим зүйлийг тодрууллаа.
- АН-ын бүлгийн хурлаар төсвийн шинэчлэлийн талаар ярилцсан байна. Гишүүд ямар байр суурьтай байна вэ?
-Хэдийгээр Сангийн яаманд очоод удаагүй байгаа ч гэсэн хуулийн хугацаандаа багтаад төсөв болон төсвийн тодотголыг өргөн барих гэж байна. Төсвийн шинэчлэлийг хийх ёстой гэж бид олон жил ярьсан. Одоо хийх цаг нь болсон гэж үзсэн. Хуулийн хугацаандаа багтаад төсвөө өргөн барих болно.
Дэд сайдын орон тоог байхгүй болгосон. АН-ын бүлгийн гишүүд дэмжиж байгаагаа илэрхийллээ. Уул уурхайн салбарын супер цикль гэж яриад байгаа алт, зэс, нүүрс зэрэг байгалийн баялгийн үнэ дэлхийн зах зээл дээр 2009-2011 онуудад их өндөр байсан. Үүнийг дагаад бид энэ онуудад төсвөө маш их тэлжээ. Үүнийгээ дагаад манай төрийн байгууллагын бүтэц маш их данхайжээ. Үүнийг бид зайлшгүй засах шаардлагатай.
Ирэх оны төсвийг бид сонгуулийн жил гэж худлаа хэлэхгүйгээр үнэн бодитоор нь гаргах гол зорилго агуулсан. Сонгуульд оноо авахын тулд худлаа төсөв хийх ёсгүй. Төсвөө хөрсөн дээр нь буулгая. Төсвөө танах хэрэгтэй байна.
АН-ын бүлэг дэд сайдгүй ажиллахыг дэмжсэн. Ерөнхий сайд бүлгийн хуралд хамт суулаа. Бид ямарч байсан бүтцээ зөв болгоё. Зөв зам руугаа явъя гэж шийдлээ.
Н.Энх
Уншиж байна |