АНУ-ын Өмнөд Каролина мужид их хэмжээний хур тунадас орж, онц байдал зарлахад хүрсэн тухай “www.dailymail.co.uk” мэдээллээ.
Тус улсын Цаг уур судалгааны төвөөс мэдээлснээр “Өмнөд Каролина мужид сүүлийн 500 жил тохиолдоогүй үер буусан” гэжээ. Үерийн улмаас өнөөдрийн байдлаар 12 хүн амиа алдаж, 180 мянган хүн орон гэрээ орхиж, түр орогнох байранд байршиж буй тухай мужийн захирагч Никки Хэйли сэтгүүлчдэд мэдэгдсэн байна.
Гудамж талбай бүхэлдээ усанд автсанаас гадна оршин суугчид цонх, дээврээрээ гэртээ орж байгаа бөгөөд ихэнх бүс нутагт өвдөг давсан ус тогтсон хэмээн албаныхан мэдээлэв.
Өнгөрөгч баасан гаригаас сургууль, цэцэрлэгийг үйл ажиллагааг зогсоосон бөгөөд өчигдөр 10 минут орчим орсон аадар борооны улмаас таван сургууль, нэг асрамжийн газар болон сүм үерт автжээ. Байгалийн гамшигийн улмаас олон тооны авс усанд хөвж, иргэдийг айдаст автуулж буй тухай “Шинэ амьдралын яам” сүмийн номлогч Уэн Ривз ярьжээ. Оршин суугчид “Гэрээсээ гарахаас ч айж байна. Учир нь ус тогтсон газруудад авс хөвж байгаа. Цагдаагийнхан энэ авснууд зүгээр авс гэж байгаа ч тэр дотор цогцос байж болзошгүй” гэсэн байна.
Б.Дэлгэрцэцэг
Уншиж байна |