ОХУ өнгөрсөн долоо хоногоос эхлэн Ойрхи Дорнодод хяналтаа тогтоохыг санаархаж буй Иракийн хэт даврагч “Халифын вант улс” бүлэглэлд агаараас цохилт өгч эхэлсэн билээ. Өнөөдөр тус улсын Батлан хамгаалахын удирдлагууд цэргийн ажиллагаатай холбоотой мэдээлэл хийсэн тухай “TASS” агентлаг мэдээлэв.
Долоо хоногийн хугацаанд хэт даврагчдын эсрэг агаараас 120 удаа цохилт өгчээ. Оросууд хэт даврагчдын 71 хуягт машин, 30 автомашин, 19 хуаран, хоёр мэдээллийн төв, 23 нефть хадгалах агуулах болон 45 ширхэг их буу зэргийг устгажээ. Харин цэргийн ажиллагааны үеэр хэдэн хэт даврагч амиа алдсан гэх мэдээллийг Сирийн Латикиа хотноо ажиллаж буй Оросын зөвлөхүүд тодруулахаар ажиллаж байгаа хэмээн Батлан хамгаалах сайд Сергей Шойгугийн хэвлэлийн төлөөлөгч мэдэгджээ. Тэрбээр “Ажиллагаа бүр амжилттай болсон. Тиймээс ихээхэн найдвар тавьж байна. Оросын цэргийн ажиллагааны хүрээнд хэт даврагчдын хүч суларсан” гэсэн байна.
Оросууд сөнөөгч “Су-24”, “Су-25” онгоцыг ашиглаж байгаа бөгөөд сөнөөгчдийнхөө тоог нэмэхээр хэлэлцэж байгаа гэнэ. Орос улс хэт даврагчдын эсрэг нэгдсэний дараа тус бүлэглэлийн дайчид Орос цэргийн толгойг 21 мянган ам.доллароор үнэлсэн юм.
Б.Дэлгэрцэцэг