Хуульзүйн байнгын хорооны гишүүд өнөөдөр даргаа сонгох асуудлыг дахин хэлэлцэнэ. Уг нь өмнөх долоо хоногт байнгын хорооны даргаа сонгох асуудлыг хэлэлцээд олонхийн саналаар Ш.Түвдэндоржийг дэмжээд УИХ-ын чуулганы хуралдаанаар батламжлуулахаар илгээсэн.
Гишүүдийн хүсэлтээр байнгын хорооны даргад нэрээ дэвшүүлсэн Ш.Түвдэндоржийг АН-ын бүлэг авч хэлэлцэн, хариуцлага тооцож, бүлгийн дэд даргаас нь чөлөөлөөд зогсохгүй, байнгын хорооны даргад сонгохыг эсэргүүцжээ. Тиймээс Хуульзүйн байнгын хорооны даргад нэрээ дэвшүүлсэн сонгогдсон тэрбээр намын бүлгийнхээ шахалтаар нэрээ татсан байна.
АН-ын бүлэг Хуульзүйн байнгын хорооны дарга Д.Ганбатыг улируулан сонгохоор шийдвэрлэсэн. Харамсалтай нь Д.Ганбатыг Хуульзүйн байнгын хорооны гишүүд нь эсэргүүцэж, итгэл үзүүлж чадахгүй гэдгээ улаан нүүрэн дээр нь хэлж, суудал дээр нь дэнжигнүүлсэн. Авлигыг дэмжиж, хуульчдын нэр төрийг унагаасан этгээдийг байнгын хорооны даргад сонгон итгэл үзүүлж чадахгүй хэмээн Ц.Нямдорж гишүүн хурлын протоколд цохон тэмдэглүүлж байна лээ.
Эдүгээ сонгоод, дэмжээд явуулсан Ш.Түвдэндорж бүлгийн дэд даргаасаа унаж, намынхаа бүлэгт донгодуулж, нэрээ татахаа мэдэгдэнэ байх. Хаалгаар өшиглөөд гаргаж байхад тооноор давуулаад шиднэ гэгчээр АН-ын бүлэг дахиад л Д.Ганбатыг Хуульзүйн байнгын хорооны даргаар сонгуулахаар илгээлээ.
Д.Ганбатыг дахин дахин Хуульзүйн байнгын хорооны даргаар сонгуулахаар зүтгүүлээд байгаагийн цаана ямар эрх ашиг нуугдаж байна вэ? Одоо ч даравч далдайж, нуувч нугдайна гэгчээр асуудал олон түмний өмнө ил болсон.
Д.Ганбат гишүүн өнгөрсөн хугацаанд Хуульзүйн байнгын хороог тэргүүлэхдээ Өршөөлийн хуулийг чуулганы хуралдаанд бэлтгүүлэх ажлыг ахалж, авлига хээл хахуулийн хэргээр шалгагдаж, мөрдөгдөж, ял эдэлж байгаа нөхдийг өршөөх заалтыг шургуулж, гишүүдийн олонхийн дэмжлэг авч, батлуулахад нөлөөлж чадсан эрхэм. Өөрөөр хэлбэл, намынхаа болоод нам доторх Шонхор фракцийн үүрэг даалгаврыг биелүүлсэн. Тиймээс ч эдүгээ УИХ Өршөөлийн хуульд Ерөнхийлөгчийн тавьсан хоригийг хүлээн авч, хуульд нэмэлт өөрчлөлт оруулахаар хэлэлцэж байгаа энэ үед дахин даалгавар гүйцэтгэх үүрэг хүлээгээд байгаа болов уу. УИХ-ын дэд дарга Р.Гончигдоржийн санаачлагаар өөрчилсөн хуулийн төслийг дэмжүүлж, парламентаар хэлэлцүүлэх үүргийг хүлээж, хэлсэн ёсоор хэрэгжүүлж чадах эрхэм гэж удирдлагууддаа тоогдсон нэгэн. Тиймээс ч АН-ын бүлэг түүний нэрийг УИХ-д хамгийн хариуцлагатай гэгддэг Хуульзүйн байнгын хороог ахлуулахаар дахин дахин дэмжээд явуулсан хэрэг.
Өнгөрсөн долоо хоногт Өршөөлийн хуулийг УИХ-аар хэлэлцэх байсан ч МАН-ын бүлэг завсарлагын хугацаагаа сунгуулсан. Энэ нь Хуульзүйн байнгын хорооны дарга сонгогдоогүйтэй мөн холбоотой. Даргаа сонгохгүйгээр дээрх асуудлыг хэлэлцэх боломжгүй. Улс төрийн асуудлаас шалтгаалан өнөөг хүртэл батлагдаагүй байгаа Өршөөлийн хуулиас үүдсэн хүлээлт нийгэмд үүсээд байна. Ял эдэлж байгаа өршөөлд хамрагдах хүмүүс суллагдаагүй байгаа. Тиймээс ч тэд хууль хэзээ батлагдахыг хүлээн хоног өдрийг өнгөрөөж байна.
Харин улстөрчдөд нийгэмд үүсээд байгаа хүлээлт бус. Хэн гэдэг эрхмийг Хуульзүйн байнгын хорооны даргаар томилохоос хамаарч эрх ашиг нь хөндөгдөх гээд байгаа бололтой.
Өнөөдөр Хуульзүйн байнгын хорооны даргаар Д.Ганбат сонгогдох эсэхээс Өршөөлийн хууль хэлэлцэгдэх үү, үгүй юу гэдэг дараагийн асуудал шалтгаалан. Эрх баригчид Д.Ганбатыг байнгын хорооны даргаар сонгуулахаас хамаарч Өршөөлийн хуулийг батлах эсэхийг барьцаалж байна гэсэн үг. Хуульзүйн байнгын хороо 19 гишүүнтэй. Энэ удаад даргад нэр дэвшигчийг МАН-ын 7 гишүүнээс гадна Х.Тэмүүжин, Ж.Батзандан, О.Баасанхүү нэр дэмжихгүй гэдэг эсрэг кноп дарвал асуудал дахин буцна. Энэ хэрээр Өршөөлийн хуулийн батлагдах хугацаа хойшлогдох юм.
АН-ын бүлэг, “Шонхор” фракцынханд механикчаас хуульчийн мэргэжил эзэмшсэн Д.Ганбат тийм үнэ цэнэтэй эрхэм үү, “утсан хүүхэлдэй” юу гэдэг асуулт дагуулсаар байна.
Н.Энх