Хятад бичигтэй хантааз өмссөн, Монгол Улсын цагдаагийн байгууллагын алба хаагчийн зураг “Дорнод Замын цагдаа” нэртэй фэйсбүүк хуудсаар дамжин өчигдөр олон нийтэд цацагдсан.
Энэ зургийн учрыг Цагдаагийн ерөнхий газрын Хэвлэл мэдээллийн төвийн ахлах мэргэжилтэн Ё.Лхагвасүрэнгээс лавлалаа. Дорнод аймгийн Цагдаагийн газар нь БНХАУ-ын Өвөр Монголын өөртөө засах орны Хянган аймгийн цагдаагийн газартай хамтран ажиллах санамж бичиг байгуулж, бүс нутгийн хэмжээнд гэмт хэрэгтэй тэмцэх чиглэлээр хамтран ажиллаж буй юм байна.
Уг хамтын ажиллагааны хүрээнд Хянган аймгийн цагдаагийн газраас Дорнод аймгийн Замын цагдаагийн газарт 10 ширхэг иж бүрэн агсамж, хэрэгсэл бэлэглэсэн аж. Иж бүрэн агсамжаас хятад бичигтэй хантаазыг Монгол Улсын цагдаагийн байгууллагад өмсөж, хэрэглэхгүй. Энэ нь Монгол Улсын хуульд харш гэдэг хариултыг албаны хүн өгсөн. Харин агсамжийн бусад хэрэгслийг хэрэглэх боломжтой эсэхийг шалгаж, дүгнэлт гаргах юм байна.
Гэтэл зарим алба хаагч агсамжийн хутганаас хамгаалах хантаазын зарим алба хаагч дур мэдэн өмсөж, цахим ертөнцөд тараажээ. Хариуцлага алдсан тэдгээр алба хаагчид албан шалгалт хийж, хуулийн дагуу арга хэмжээ авах аж.
Б.Хүлэг