МҮХАҮТ-ын дэргэдэх авто захуудын зөвлөлөөс санаачлан авто захуудыг нүүлгэн шилжүүлэх тухай асуудлаар олон талт уулзалт зохион байгууллаа. Уг уулзалтанд ШӨХТГ-ын дарга Т.Аюурсайхан, МҮХАҮТ-ийн орлогч дарга М.Сарандаваа нар оролцов. Мөн танхимын дэргэдэх захуудын бизнес эрхлэгчид болон үйлдвэрчний эвлэлийн холбоод оролцсон юм. Уулзалтанд нийслэлийн Засаг дарга Э.Бат-Үүл, Мэргэжилийн хяналтын ерөнхий газрын төлөөллийг урьсан ч ирээгүй аж.
НИТХ-ын 29 дүгээр тогтоолын дагуу авто захуудыг нүүлгэн шилжүүлэх захирамж гарсан юм. ШӨХТГ-аас бизнес эрхлэгчдийн гомдлын дагуу уг захирамж, хууль эрхзүйн үндэстэй эсэхэд шалгалт явуулжээ. Шалгалтаар авто захуудыг нүүлгэн шилжүүлэх ил захирамж нь хуулийн үндэслэлгүй. Мөн Өрсөлдөөний тухай хуулийн заалтыг зөрчсөнийг Улсын байцаагчын дүгнэлтээр тогтоосон тухай мэдэгдлээ. Аливаа шийдвэрийг гаргахдаа хуулийн аль дүрэм, журмыг зөрчиж байгаа тухай тодорхой заасан байдаг. Гэвч уг захирамжинд тодорхой заагаагүй байна. Тиймээс хуулийн үндэслэлгүйгээр бизнес эрхлэгчдийг хохироож байгааг ШӨХТГ-ын дарга Т.Аюурсайхан хэлж байв. Тэрбээр нийслэлийн удирдлага, мэргэжлийн хяналтын газрыг хуульд заасан үндэслэлтэйгээр шийдвэрээ гаргахыг шаардлаа.
МҮХАҮТ-ын зөвлөлөөс НИТХ-д удаа дараа санал гаргаж, аж ахуй нэгж байгууллагуудын санал хүсэлтийг танилцуулах гэсэн боловч одоог хүртэл хариу ирүүлээгүй аж. Тиймээс бизнес эрхлэгчдийн саналыг сонсолгүйгээр тулган шаардаж, албадан нүүлгэх шаардлагад эсрэг байр суурьтай байгаагаа МҮХАҮТ-ын орлогч дарга М.Сарандаваа хэллээ.
Уулзалтад оролцсон бизнес эрхлэгчид баруун хэсэгт техникийн захуудыг нүүлгэн шилжүүлснээр хотын баруун тийш явах замын урсгал улам ихсэнэ. Тиймээс зэрэгцээ хувилбар буюу хотын зүүн, баруун хэсэгт авто захыг байгуулах саналыг дэвшүүлж байлаа.
Г.Тэгшсүрэн