Нийслэлд үйл ажиллагаа явуулдаг авто худалдааны төв болон захуудыг хотоос гаргаж, Сонгинохайрхан дүүрэгт байгуулсан Авто худалдааны цогцолборт төвлөрүүлэхээр болсон. Гэвч авто худалдаачид нүүхгүй хэмээн өнөөг хүртэл эсэргүүцэж буй юм. 

Тэгвэл өнгөрсөн баасан гаригаас эхлэн зарим авто захуудыг албадан битүүмжилжээ. Тухайлбал вокзалын ард байрлах 1000 машины авто захыг УБТЗ-ын хамгаалалтын албаныхан битүүмжилсэн байна. Харин энэ нь авто худалдаа эрхлэгчдийн эсэргүүцэлтэй тулгарч, бужигнаан үүсгээд байна.

Энэ талаар “Их тэнгэрийн хас” тээврийн хэрэгсэл, авто сэлбэг импортлогч, борлуулагчдын эрх ашгийг хамгаалах үндэсний нийгэмлэгийн төлөөлөгчөөс тодруулахад "Төмөр замын байгууллагаас газраа хамгаалж байна хэмээн гурван өдрийн турш биднийг хохироолоо. Бүх хаалган дээр нохойтой хамгаалагчид зогсч, ашиг орлогыг маань хааж боож байна. Төмөр замын газар гэж байгаа ч гэрээний маргаантай байна" гэв.