Зам, тээврийн яамны Төрийн нарийн бичгийн дарга асан, “Монголын төмөр зам” ТӨХК-ийн ТУЗ-ийн дарга асан Б.Батзаяа, “Эл Си Ти Эс” компанийн гүйцэтгэх захирал БНСУ-ын иргэн Ли Ёнг, “Монголын төмөр зам” ТӨХК-ийн хэлтсийн дарга З, “Бизнес Имблоёд” компанийн захирал Б нарын дөрвөн хүнийг эрүүгийн хэрэгт сэжигтнээр татан, таслан сэргийлэх арга хэмжээ аваад байна.
Эрүүгийн цагдаагийн газрын Эдийн засгийн гэмт хэрэгтэй тэмцэх тасгийнхан тэднийг Эрүүгийн хуулийн тусгай ангийн 148 дугаар зүйлийн 148.4 буюу Бусдын эд хөрөнгийг залилан мэхлэж авсны улмаас онц их хэмжээний хохирол учирсан, Эрүүгийн хуулийн тусгай ангийн 1661 дүгээр зүйлийн 1661.2 буюу мөнгө угаах гэмт хэргийн улмаас онц их хэмжээний хохирол учруулсан хэрэгт сэжиглэн шалгаж, хэргийн мөрдөн байцаалтын ажиллагаа явагдаж байгааг албаны эх сурвалж хэлсэн.
Түүнчлэн Б.Батзаяа нарын хамтаар “Либерти Партнерс” компанийн захирал Ч.Ганбат, “Монголын төмөр зам” ТӨХК-ийн дэд захирал асан Ж.Бат-Эрдэнэ нарыг баривчлах тушаал гарсан байсан гэж мэдээлэгдсэн. Тэгвэл уг мэдээллийг албаны эх сурвалж үгүйсгэсэн юм. Харин монголын төмөр замын хэрэгтэй холбоотойгоор тодорхой албан тушаалтан, бусад хүмүүсээс тайлбар, мэдүүлэг авах ажлыг зохион байгуулж байна гэсэн. Энэ ажил хэргийн мөрдөн байцаалтын явцад цаашид ч үргэлжлэх аж. Тухайлбал, тухайн үед салбарын сайдаар ажиллаж байсан А.Гансүх, Х.Баттулга нараас гэрчийн мэдүүлэг авах бололтой. Энэ талаар өчигдөр УИХ-ын гишүүн Х.Баттулга хэвлэлийн бага хурал хийх үеэрээ мэдээлсэн байсан.
Өнөөдөр хэвлэлүүдээр "Самсунг СТ"-н дансанд орсон ашиг 130 гаруй сая долларын 70 хувь нь буцаж Монгол руу нэг хүний дансанд орж, цаашаагаа таван хүний данс руу шилжсэн байна гэх эх сурвалжийн мэдээлэл нийтлэгдэж байна. 2013 онд Ухаахудаг-Гашуун сухайт чиглэлийн төмөр замын “Барилгын ерөнхий гүйцэтгэгчийн гэрээ”-г Өмнөд Солонгосын “Самсунг С&Т” компанитай байгуулж, Чингис бондоос 200 сая ам.долларын санхүүжилт олгосон гэгддэг. Гэтэл төмөр замын ажлыг гүйцэтгэж, туслан гүйцэтгэгчээр монголын компаниудыг авч ажиллуулж байсан Өмнөд Солонгосын гэгдэх “Самсунг СТ” компани нь монгол компани байсан гэж зарим эх сурвалж мэдээлэв.
Энэ мэт олон таамаг, сураг дагуулсан монголын төмөр замын хэргийн мөрдөн байцаалтын ажиллагаа үргэлжилж байна.
Б.Хүлэг