Бие дааж нэр дэвшигчдийг дэмжих хөдөлгөөнийг санаачлагч иргэн О.Лхавгадорж, С.Батчулуун, О.Оюунболд нар хэвлэлийн хурал хийв. Тэд намаас татгалзаж, бие даагчдыг дэмжих тухай тунхагийг олон нийтэд зарлан түгээж намуудын эсрэг зохион байгуулалттай хөдөлгөөнийг эхлүүлж буйгаа мэдэгдлээ.
Хөдөлгөөний санаачлагчид “Цаг боллоо, намаас ангижиръя, бодитоор цэгнэе, төрөө засах гарц, бие даагчдыг дэмжих шалгуур” гэсэн үндсэн таван хэсгээс бүрдсэн тунхаг бичгийг танилцуулав. Тунхагийн гол агуулга нь “Ард түмний амар түвшин, сайн сайхан амьдралыг хангах нэгдмэл зорилгын төлөө явж чадах, бие даан нэр дэвшигчийг дэмжин сонгох нь, Төр засгийн дампуурлыг засаж өөрчлөх, хууль ёсны ганц арга зам” гэдэгт оршиж байгаа аж. Мөн тэд “Нам хөрөнгөтэй байж болдог. Төр хөрөнгөтэй байж болдоггүй тогтолцоо бий болж намууд төсвийн хөрөнгийг хяналтгүй зарцуулж байна. Төрийн дээр нам гарчихлаа” гэдэгт үзэл бодлоо нэгтгэжээ. Тиймээс “Намаас татгалзаж бие даагчдыг дэмжье” хэмээн олон нийтэд уриалж байгаа юм байна.
Хурлын төгсгөлд “Ямар нэгэн яам тамгын газарт шаардлага хүргүүлэхгүй. Өөрсдийн хүчээр олон нийтийг нэгтгэж намын болчимгүй улстөрчдийн гараас улс орноо, тусгаар тогтнолоо авран хамгаална” гэдгээ бие даан нэр дэвшигчдийг дэмжих хөдөлгөөнийг санаачлагч О.Лхавгадорж онцлов.
Г.Тэгшсүрэн
Уншиж байна |