“Эрдэнэс Таван толгой” компанийн ҮЭ-ийн дарга С.Эрдэнэ хэвлэлийн хурал хийх үеэрээ өөрийгөө шатаах үйлдэл гаргасан. Энэ хэргийн талаар УИХ-ын гишүүн Г.Уянга, Ц.Даваасүрэн нар байр сууриа илэрхийлж мэдээлэл хийв. Гишүүд энэ хэрэг тус компанийн гүйцэтгэх захирал Б.Батбилэгийг ажлаас нь чөлөөлөөд өнгөрөх асуудал биш, Уул уурхайн сайд Р.Жигжид, Ерөнхий сайд Ч.Сайханбилэг нар хариуцлага хүлээж огцрох хэрэгтэй гэв.
УИХ-ын гишүүн Г.Уянга:
-“Эрдэнэс Таван толгой”-н ажилчид ажлын байраар л хадгалж үлдэх гэсэн. “Эрдэнэс Таван толгой” “МакМахон” компанийн охин компани болох “TTJVCO” компаниар зүүн Цанхиас нүүрсээ олборлуулах гэрээ 2011 онд хийсэн. Гэтэл тэд баруун Цанхиас хоёр дахин үнэтэй олборлолт хийгээд байсан. Монгол Улсад алдагдалтай байсан учраас 2014 онд УИХ-ын ажлын хэсэг шалгаад өндөр өртөгтэй олборлож болохгүй, олборлолтын өртгөө хямдруул гэдэг үүрэг өгсөн. Тэгсэн “TTJVCO” компани “олборлолтын өртгөө бууруулах юм бол бид танай ажилчдаар олборлуулахгүй. Хятад ажилчдаа оруулж ирж, олборлуулна” гэсэн. Тэгэхээр эдгээр ажилчин өөрсдийнхөө төлөө тэмцэх нь зүйн ёсны хэрэг. Учир нь тэд төрийн өмчит компанид ажиллаж байгаа төрийн ажилчид. Тус компанийнхан 2011 онд МАНАН-гийн Засгийн газар “TTJVCO” компаниар 2017 он хүртэл олборлолт хийлгэнэ” гээд гэрээ байгуулчихсан. Хэрвээ гэрээгээ цуцалбал бид 100 сая.ам долларын өрөнд орно” гэх хариуг хэлээд сууж байна. Ийм алдагдалтай гэрээ хийж, алдагдатай нүүрс олборлолт хийлгэж, төрийг ийм олон зуун сая ам.долларын алдагдалд оруулах гэрээг МАНАН хийсэн. Тэгэхээр энэ хэрэгт гарцаагүй Засгийн газар хариуцлага хүлээх ёстой. Б.Батбилэгийг ажлаас нь халаад бамбай хийгээд энэ асуудлыг хаах гэж байна. Б.Батбилэгээр бамбай хийгээд ард нь хариуцлага хүлээх ёстой хүмүүс нь үлдэж болохгүй. Уул уурхайн сайд Р.Жигжидийг огцруулах ёстой. С.Баярцогт ч мөн адил ТУЗ-ийг тэргүүлдгийнхээ хувьд огцрох ёстой гэхдээ мөн л багадна. Засгийн газар өөрөөр хэлбэл Ч.Сайханбилэг энэ хариуцлагыг хүлээх ёстой. Засгийн газрыг огцруулах маш том хүндэтгэх шалтгаан бол энэ үйл явдал мөн гэж бодож байна хэмээлээ.
Түүнчлэн УИХ-ын гишүүн Ц.Даваасүрэн “Энэ бол “Эрдэнэс Тавантолгой”-г хил давуулаад шидэх гэсэн башир арга. Тиймээс цаашид цөхрөлтгүй тэмцэж ажлын байраа авч үлдэн Ч.Сайханбилэгийг огцруулах хүртэл тэмцэх хэрэгтэй” гэж мэдэгдлээ.
Н.Энх