Нийслэлийн нийтийн тээвэр цахим төлбөрийн системд шилжээд багагүй хугацаа өнгөрч байна. Одоогоор 535 000 иргэн цахим картаа худалдан авчээ. Улаанбаатар смарт карт компанийн зүгээс картын борлуулалт сайн байгаа ч иргэд байнга ашиглахгүй байна гэсэн тайлбарыг өгч байна. Тиймээс бэлэн мөнгөөр зорчиж буй иргэд илүү тариф төлөх асуудал яригдаж байна.
Бэлэн мөнгөөр зорчиж буй иргэд автобусанд 1000 төгрөг төлөх асуудал өнгөрсөн наймдугаар сард яригдаж байсан. Харин НИТХ-аас шийдвэр гаргаж, картгүй иргэд 1000 бус 700 төгрөг төлж, автобусанд зорчих шийдвэр гарсан юм. Энэ шийдвэр хэзээнээс хэрэгжих нь тодорхойгүй байна. Нийслэлийн Тээврийн газар болон Улаанбаатар смарт карт компаниас ч энэ талаар тодорхой хариулт өгсөнгүй.
Цахим төлбөрийн системтэй холбоотойгоор автобусанд дамжин суулт үнэгүй болсон. Дамжин суултыг үнэгүй болгох шийдвэр хэрэгжээд 18 хонож буй бөгөөд өдөрт 40 000 орчим иргэн автобус сэлгэн суудаг байна. Ачаалал ихтэй Мах импекс-Улаанхуаран, Офицеруудын ордон-Таван шар, ХМК- Офицеруудын ордон чиглэлд дамжин суулт их байгааг Улаанбаатар смарт карт компанийн мэргэжилтэн хэлж байна.
В.Бат
Уншиж байна |