ХААЯ-аас малын хулгайтай тэмцэх зорилгоор “Малчин лавлах 109” тусгай дугаарыг 2015 оны 10 дугаар сараас ажиллуулж эхэлсэн. Тус лавлах нь бүх үүрэн телефоны дугаараас үнэ төлбөргүй.

Мөн малчдаас ирсэн малын зарыг олон нийтийн мэдээллийн хэрэгслээр түгээж, алдуул болон хулгайлагдсан малыг эрэн сурвалжлах ажлыг орон даяар шуурхай зохион байгуулдаг юм. Тодруулбал, малчдын өгсөн алдуул болон олсон малын зарыг Молор телевизээр өдөрт гурван удаагийн давтамжтайгаар, 88.8 радиогоор тогтмол мэдээллэдэг. Түүнчлэн Todsurag.mn сайт дээр малчид өөрсдөө алдсан, олсон малын зараа байршуулах боломжийг бүрдүүлж өгсөн юм. “Малчин лавлах 109” дугаарт нь хоёр сарын хугацаанд 24 хүний 40 гаруй алдуул малын сургийг гаргаж эзэдтэй нь холбож өгсөн байна. Хамгийн сүүлийн мэдээллээр Төв аймгийн Аргалант сумын малчин Х.Барсхүүгийн 2015 оны 8 дугаар сард алдагдсан хоёр үрээний сургийг гаргаж 11 дүгээр сарын 26-ны өдөр эзэнд нь хүлээлгэж өгчээ.