“Ард санхүүгийн нэгдэл”-ийн гүйцэтгэх захирал Ч.Ганхуяг мэдээлэл хийлээ. Тэрбээр хэвлэх үйлдвэрийн барилгыг олон нийттэй хамтран худалдаж авах санаачилга гаргасан ч дуудлага худалдаанаас хоцорсон. Гэвч өөрт нь итгэл хүлээлгэж, мөнгө шилжүүлсэн хүн бүрт “Ард санхүүгийн нэгдэл”-ийн 20 ширхэг хувьцаа өгөхөөр болжээ.

Тэрбээр “Яаруу гаргасан шийдвэр байсан учраас хувьчлалын тендерт оролцож амжаагүй. Хүлцэл өчье. Хагас сайны өглөөнөөс залуучууд мөнгөө шилжүүлж эхэлсэн. Амралтын өдөр байсан хэдий ч хэн ч тооцоолоогүй их хэмжээний мөнгө төвлөрүүлж чадсан. Энэ үйлдэл надад их зүйлийг бодогдуулсан. Бид хамтраад төрийн болон нийтийн өмчийг хувьчилж авах, эзэн суух боломжтой юм байна гэдэг ойлголтыг нийгэмд бий болголоо. Бүх Монголчуудад итгэл төрсөн” хэмээв. Мөн “Бид тендерт оролцсон ч худалдан авах боломж байгаагүй. 24 тэрбум төгрөг бол асар их мөнгө. Энэ мөнгө эргээд улсын төсөвт орох учраас бидэнд хэрэгтэй” гэв. 

Мөнгө шилжүүлсэн хүмүүсийн итгэл, зүтгэлийг нь үнэлээд “Ард санхүүгийн нэгдэл”-ийн 20 ширхэг хувьцааг тэдний нэр дээр шилжүүлэх болсноо дуулгалаа. Харин хичнээн хүний, хэдэн төгрөг цугларсан талаар тодруулахад “Тэрийг би хэлэхгүй. Өөртөө нэг том давуу тал аваад үлдэе гэж бодож байна” гэсэн юм.

Хамтран нэгдэхээр мөнгөө шилжүүлсэн залуусын мөнгийг буцаан шилжүүлэх ажил үргэлжилж буй хэвлэлийн хурлын үеэр мөн дуулгасан.

Г.Тэгшсүрэн