АНУ-ын Ерөнхийлөгч Барак Обама өчигдөр сэтгүүлчдийг Цагаан ордондоо хүлээн авч, цаг үеийн асуудлаар ярилцлага өгчээ.
-АНУ-ын Калифорни мужийн Сан Бернардино хотноо байрлах хөгжлийн бэрхшээлтэй иргэдэд зориулсан “Inland Regional Center” төвд гэмт этгээдүүд халдлага үйлдэж, 14 хүний аминд хүрсэн. Энэхүү халдлагыг терроризмтой холбох хэрэггүй хэмээн цагдаагийн байгууллагаас мэдээлж байгаа. Энэ талаар?
-Энэ бол гэм зэмгүй иргэдийг алах зорилготой терроризмын үйлдэл.
-Халдлага үйлдэгчид гэр бүлийн хоёр болохыг тогтоосон?
-Хэт даврагчид тэдний тархийг угаасан. Тэд эх орныхоо эсрэг буу чиглүүлсэн нь үнэхээр харамсалтай. Хосыг хэт даврагчидтай холбоотой эсэхийг хараахан тогтоогоогүй байгаа ч тэд хэн нэгний ятгалга, уриалгад автсан нь тодорхой.
-Дараалласан халдлагуудаас болж манай улсын нэр хүнд унаж эхэллээ?
-Эдгээр халдлагын захиалагч нь нэг гэж бодож байна. Тэд биднийг дайнд уриалан дуудаж, санаатайгаар өдөөн турхирч байгаа.
-АНУ аль хэдийнэ хэт даврагчдад цохилт өгч эхэлсэн. Тэд үүнээс илүүг хүсч, шаардаж байна гэж үү?
-Терроризм бол бодитой зүйл. Иракийн хэт даврагч “Халифын вант улс” бүлэглэл Америкийн нэг ч гэсэн энгийн иргэнийг хөнөөж, биднээс хариугаа авахаар тэмцэж байна. Биднийг хорлохын тулд бүхий л бололцоогоо ашиглаж буй ч бид харамсалтайгаар амиа алдсан иргэдийнхээ өшөөг заавал авч, тус бүлэглэлийг үндсээр нь устгах болно.
-Ямар аргаар бид ялалтад хүрэх вэ. Хэдий хүртэл бид заналхийлэл дунд амьдрах вэ?
-Бид хүчтэй, уян хатан, тууштай байсан цагт дайснаа ялах болно. Эхний ээлжинд гадна бус дотор байгаа дайсантайгаа тулалдах хэрэгтэй. Энэ бол галт зэвсэг. АНУ-ын иргэн. 21-ээс дээш насных. Ямар нэгэн сэтгэцийн өвчингүй, бие даах чадвартай бүх хүн галт зэвсэг эзэмших эрхтэй. Конгресс энэ хуулийг өөрчлөх хэрэгтэй. Тэд хуулинд өөрчлөлт оруулахгүй удах тусам иргэд эх баригчдынхаа баталсан хуулийн золиос болох нь ихсэх болно.
-Таны бүрэн эрхийн хугацаа тун удахгүй эцэслэх болно. Нэр дэвшигчид сонгуулийн сурталчилгаандаа лалын шашинтнуудыг өдөөн турхирсан зүйлийг ярьж байна. АНУ-д гарч буй халдлагуудыг лалын шашинтнууд үйлдэж байна?
-Шашин шүтэх нь хувь хүний асуудал. Шашин шүтлэгээс нь болж хэн нэгнийг гадуурхах нь хууль бус. Бидэнд хэн нэгнийг шашнаар гутаан доромжлох эрх байхгүй. Эргэн сануулахад 2011 оны есдүгээр сарын 11-ний халдлагаас хойш лалынхан аюултай гэх яриа иргэд болон улстөрчдийн дунд гарах болсон.
-“CNN” агентлагийн явуулсан санал асуулгаар таны санаачилсан “Терроризмын эсрэг ажиллагаа”-г америкчуудын 60 хувь нь “буруу, үр дүнгүй” хэмээн дүгнэсэн. Мөн АНУ, Ойрхи Дорнодын асуудалд оролцож эхэлснээр Америкт халдлага гарах нь ихэссэн хэмээсэн?
-АНУ-ын хариу арга хэмжээ түрэмгий биш. Бид нэг улсын эрх ашгийг хамгаалахын тулд тэмцэж байна. Сири, Ирак улсад хяналтаа тогтоохыг санаархаж буй “Халифын вант улс” бүлэглэлийн эсрэг АНУ нэгдсэн. Бид энгийн иргэдийн эсрэг бус хэт даврагчдын эсрэг нэгдэж, үр дүнтэй ажиллагаа явуулахын тулд тэмцсээр байна. Тэдний эсрэг нэгдсэнээр бидний эх орон заналхийлэлд өртөж, зарим тохиолдолд энгийн иргэд алтан амиараа хохирогч болж байна. Гэхдээ эдгээр зүйл дээрх улсуудад өдөр бүр, цаг, минут бүрт тохиолддог гээд бодоод үз. Тэднийг үндсээр нь устгах хүртэл бид тэмцсээр байх болно.
Б.Дэлгэрцэцэг