БНХАУ-ын Батлан хамгаалах яамнаас манай улсын зэвсэгт хүчинд машин, техник хэрэгслийн туслалцаа үзүүллээ. Уг техник хэрэгслийг өнөөдөр Зэвсэгт хүчний 014 дүгээр ангид хүлээлгэн өглөө. Нийт 13.0 сая юанийн үнэ бүхий 22 нэгж барилга, зам инженерийн техник хэрэгслийг хоёр улсын Батлан хамгаалах яамны хооронд байгуулсан хэлэлцээрийн дагуу манай улсад тусламж болгон өгч буй аж.
Техник хэрэгслийг гардуулах үеэр Батлан хамгаалахын сайд Ц.Цолмон “Хятадын ардын чөлөөлөх армиас буцалтгүй тусламжаар хүлээн авсан замын техник хэрэгслүүдээр бид Монгол орныхоо хэрэгцээтэй газарт хүрч, зам барьж, байгуулж чадна. Зэвсэгт хүчинд шаардлагатай боловсон хүчин бэлэн байгаа” гэв.
Мөн өнөөдөр ОХУ-ын Батлан хамгаалах яамнаас тусламж болгон илгээсэн байлдааны техникийг 014 дүгээр анги хүлээн авлаа. Хоёр улсын Засгийн газар болон Батлан хамгаалах яамны хэлэлцээрийн дагуу ОХУ-аас нийлүүлж буй техник хэрэгслийн хоёр дахь цуваа нь энэхүү 20 орчим танк аж.