МАХН-ын дарга Н.Энхбаярыг Монгол Улсын Шадар сайд болгох саналыг Ерөнхий сайдад хүргүүлээд буй. Мөн Ц.Оюунбаатарыг Шадар сайдын албан тушаалаас нь чөлөөлж, ЭМС-ын сайд болгох санал ч Засгийн газрын тэргүүнд очоод буй. Энэ асуудлаар МАХН-ын Ерөнхий нарийн бичгийн даргын үүргийг түр орлон гүйцэтгэгч Ц.Шаравдорж, нарийн бичгийн дарга Э.Эрдэнэжамъян нар мэдээлэл хийлээ. Тэд намын даргаа Шадар сайдын албан тушаалд томилуулах саналаа Ерөнхий сайдад хүргүүлээд буйгаа албан ёсоор мэдэгдэж, энэ асуудлаар сэтгүүлчдийн асуултад хариулт өгөв.
-Танай намын даргыг Шадар сайд болгох саналыг хаанаас гаргасан вэ?
Манай нам энэ саналыг тавиагүй. Ерөнхий сайд ийм санал гаргасан. Түүний саналыг бид нам дээрээ нэлээд ярилцаж, шийдвэр гаргасан.
- Н.Энхбаярын ялтайд тооцох хугацаа дууссан уу?
Өршөөлийн хуулиар нэмэгдэл ял буюу ялтайд тооцох хугацаа өршөөгдсөн. Тийм учраас ямар ч саад байхгүй.
-Энэ асуудлаар МҮАН-тай зөвшилцсөн үү?
МҮАН-тай санал нэгтэйгээр асуудлыг тавьсан. МАХН-МҮАН-ын УИХ дахь бүлгийн хүсэлт Ерөнхий сайдад очсон байгаа.
-Н.Энхбаяр Шадар сайд болохгүй гэж байсан. Харин одоо Шадар сайд болох гэж байгаа нь ямар учиртай вэ?
Манай нарийн бичгийн дарга нарын хурлаар энэ асуудлыг хэлэлцсэн. Тухайн намын хамгийн сайн хүн сонгууль удирдаж ордог. Тиймээс Н.Энхбаяр дарга өөрөө хүсч байгаа эсэх нь чухал биш. Энэ бол намын гишүүдийн байр суурь. Засагт хамтарч байгаа учраас намын дарга нар өөрөө засагт орж ажиллах ёстой гэсэн байр суурьтай байна.
В.Бат
Уншиж байна |