“Монгол тулгатны зуун эрхэм” нэвтрүүлгийн дүрс алдагдсантай холбогдуулан “Hero entertainment” студийн захирал, найруулагч Б.Баатар хэвлэлийн хурал хийв. Тэрбээр маш том мэргэжлийн нарийн зохион байгуулалттай бүлэглэл серверт халдсан гэж үзэж буйгаа онцлон хэллээ.
Б.Баатар хэлэхдээ “ Улсын архивт хүлээлгэж өгөхөөр хадгалж байсан Монгол Улсын гурав дахь ерөнхийлөгч Н.Энхбаярын оролцсон “Монгол тулгатны 100 эрхэм” нэвтрүүлгийн бичлэг алдагдсан. Мөн манай уран бүтээлчид С.Зориг агсны тухай баримтат киног хийж байгаа. Уг кинонд хэрэглэхээр “хард” дискинд хуулаад тусад нь хадгалж байсан файл, сонины хайчилбар алга болсон. Энэ бол оюуны маш том хулгай. Улс төрийн үйл хэрэг хэт доошоо орсныг илтгэж байна. Хавтаст байсан дүрс, бичлэгүүд маш нарийн мэргэжлийн дагуу хуулагдсан байгаагаас харахад энэ бол эртнээс судалж хийсэн хулгай. Мөн нэг биш хэсэг бүлэг хүмүүсийн зохион байгуулалттай хийсэн үйлдэл гэдгийг цохон тэмдэглэмээр байна” хэмээв.
Хэвлэийн хурлын үеэр тэрбээр хариуцлага алдсаныхаа төлөө Н.Энхбаярын гэр бүл, гэргий О.Цолмонгоос уучлалт хүсэж буйгаа хэллээ.
Тэрбээр цагдаагийн байгууллага болон оюуны өмчийн газарт гомдол гаргажээ.
Г.Тэгшсүрэн