“Ирвэс хамгаалах сан” ТББ-ын ирвэс судлаач, биологич Т.Лхагвасүмбэрэлийн амиа алдсан хэрэг нэгэнт өндрөө авч, ярихгүй хүнгүй болжээ. УИХ-ын гишүүд ээлж дараалан аав Ж.Төмөрсүхийг нь хүлээн авч уулзаж, хүүг нь эх оронч байсан хэмээн тунхаглаж, хэрэгтэн шийтгүүлэх ёстой гэж гарыг нь атгаж байна.
Хэрэг үйлдэгдсэн даруйд Тост, Тосон бумбын нуруунд ашигт малтмалын тусгай зөвшөөрөл эзэмшдэг компаниуд гол сэжигтэн болж, түүнийг хөнөөсөн хэрэгтнүүд тодорхой байгаа мэтээр ярьж байв. Бүр УИХ-ын гишүүн Б.Чойжилсүрэн түүнийг хөнөөсөн мэтээр ярьж байсан нь саяхан. Тосон бумбын нуруунд 16 компани ашигт малтмалын 26 тусгай зөвшөөрөл эзэмшдэг бөгөөд тэдний дундаас хэрэгтнийг хайж байсан сэжүүр одоо өөр тийш эргэв.
Цагдаагийн ерөнхий газраас хийсэн өчигдрийн мэдээллээс талийгаач залуу амиа хорлосон уу гэх асуулт урган гарав. Цагдаагийн байгууллага “амиа хорлосон” гэж тодорхой хэлээгүй ч мэдээлэл ийм агуулгатай байсныг хүмүүс анзаарсан биз. Наанадаж л түүний утсанд зөвхөн өөрийнх нь яриа бичигдсэн гэдгийг шинжээчид тогтоосон гэв. “Дуугүй бай чи” гэсэн үг хэн нэгэн дарамтлагчийнх бус өөрийнх нь дуу хоолой болов.
Цаашлаад Өмнөговь аймагт өртсөн халдлага нь ч хариуцагчгүй байж болзошгүй болж таарав. Гурвантэсийн цагдаагийн алба хаагчид хэргийн газарт үзлэг хийхдээ нутгийн мөрч, анчин зэрэг ул мөр бэхжүүлэх ахуйн туршлага, чадвартай хүмүүсийг оролцуулан ажилласан ч мотоциклийн хуучин мөрөөс өөр мөр тогтоогдоогүй гэж үзсэн байна. Дээр нь ирвэс ихтэй учраас хэр баргийн хүн ойртдоггүй газар халдлагад өртсөн нь цагдаагийнхны сонирхлыг татаж буй бололтой. Гэхдээ мөн л “өөрийгөө хутгалсан” гэж хэлээгүй.
Нас барахаасаа өмнө гурван ч удаа халдлагад өртсөн. Тэр бүхнийг санаанаасаа зохиож, өөрийгөө гэмтээсэн гэвэл эрүүл хүний ухаанд багтахгүй биз. Талийгаач эрүүл бус эсвэл энэ бүхнийг зохиомол гэж ойлгуулж, ойлгож байгаа бид мэдрэлдээ юмтай байх.
Ямартай ч мөрдөн байцаалтын ажиллагаа явагдаж байгаагаас үүдсэн бүрхэг, тодорхойгүй зүйл олон байна. Халдлагад өртөх бүртээ цагдаагийн байгууллагад мэдэгдээгүй, дуудсан цагт нь цагдаад очоогүй гэхчлэнгээр цагдаа нарт ч түүнийг буруутгах сэжүүр олон байгаа бололтой. Тиймдээ ч “арьсаа хамгаалсан” мэдээлэл хийж, олон нийтийн дунд тоймгүй олон таамгийг бий болгов.
“Миний хүү амиа хорлох хүн биш” гэж байгаа аавын үгэнд итгэх үү, байж болзошгүй гэсэн таамгыг дэвшүүлж буй цагдаагийн байгууллагад найдах уу.
Ашигт малтмалын асуудал, УИХ-ын гишүүний нэр холбогдсоноос нэлээд өндөрт яригдаж эхэлсэн эл хэрэг амиа хорлолт, зохион байгуулалттай аллагын алин бол!?
В.Хэрлэн