НИТХ-ын дарга Д.Баттулга хотын мандатыг нэмэх хүсэлтийг УИХ-ын даргад хүргүүлсэн. Тэрбээр 2016 оны УИХ-ын сонгуулийн тойрог байгуулж мандатын тоог тогтоохдоо нийслэлд оногдох тойргоос сонгогдох 48 мандатын 44 хувь буюу 21 мандатыг нийслэлд хуваарилахыг хүссэн юм.
Тэгвэл энэ асуудлаар Сонгуулийн ерөнхий хороо хуралдаж хөдөө орон нутгаас сонгогдох УИХ-ын гишүүдийн тоог 8-аар бууруулж, Улаанбаатар хотоос сонгогдох гишүүдийн тоог 8-аар нэмэгдүүлэх саналыг УИХ-д ирүүлжээ. Энэ саналыг МАН эсэргүүцэж буйг тус бүлгийн дарга С.Бямбацогт дөнгөж сая сэтгүүлчдэд өгсөн мэдээлэлдээ онцолсон.
Мөн МАН-ын гишүүд ч өөр өөрийн байр суурийг илэрхийлээд эхэлжээ. Тухайлбал УИХ-ын гишүүн Ч.Хүрэлбаатар "Уг нь СЕХ 1-р сарын 6-нд хуралдаад мандатын тоог өөрчлөхгүй гэсэн шийдвэр гаргачихсан байсан. Дарга нар нь шахсан юм шиг. Увс, Ховд, Баян-Өлгий гээд алслагдсан, хил хязгаар нутгийн ард түмний дуу хоолой УИХ-д улам л буурах юм байна. Энэ аймгуудын ард иргэдийг УИХ-д тус бүр нэг л хүн төлөөлнө. Хил хязгаар эзэнгүй болж тусгаар тогтнол бүдгэрэх цаг ингэж АН-ын эрх барьж байх үед ирэх юм гэж огтхон ч төсөөлсөнгүй" хэмээн бичжээ.
В.Бат