УИХ дахь МАН-ын бүлгийн хурал өндөрлөлөө. Хуралдаан хэлэлцсэн асуудлын талаар тус намын бүлгийн дарга С.Бямбацогт мэдээлэл хийв. Тэрбээр мэдээлэлдээ:
-Ерөнхий сайдыг огцруулах асуудлыг зарим нэр бүхий гишүүд өргөн барьсан. Мөн УИХ-ын дарга хуралдаан зохион байгуулахдаа ёсзүйгүй үйлдэл гаргаж байна. Тойргийн мандатын тоо аймаг, нийслэлд хуваарилах асуудал маргаан дагуулж байгаа. Эдгээр асуудлыг хэлэлцэн байр сууриа нэгтгэлээ. МАН-ын бүлэг 100 хувийн саналаар Ерөнхий сайдыг огцруулах асуудлыг дэмжинэ. Учир нь ард түмнийг хуурсан Ерөнхий сайд. Нэг ч төгрөгийн татвар нэмэхгүй гэсэн. Гэтэл татварын үнийг нэмсэн. Шатахууны үнэ буух боломжтой байсан. Гэвч татварын үнэ нэмээд шатахууны үнийг бууруулах боломжгүй болгосон. Мөн 1 тэрбум төгрөгийн мах экспортолно гээд одоог хүртэл хэрэгжүүлээгүй. Иргэд, малчид хүлээлттэй байна. Мөн хүүхдийн мөнгийг олгох асуудлыг 6 тэрбум төгрөг зарцуулан өрхийн судалгаа явуулсан. Ингээд 300 мянган хүүхдийн мөнгийг олгохгүй шийдвэр гаргаж ард иргэдийг бухимдуулсан. Эдийн засаг өнөөдөр 2 хувь болж буурлаа. Валютын ханш түүхэндээ байхгүй рекорд тогтоолоо. Улсын төсөвт гурван удаа тодотгол хийсэн гэх зэрэг олон асуудлыг хөндөж болно. Өмнө нь өр зээл тавьсан байгаа. Гэтэл Ерөнхий сайдыг огцруулах асуудлыг өргөн барих үед дахиад 850 сая ам.долларыг зээлэхээр хөөцөлдөж байсныг мэдлээ. Үнэхээр улс орноо өрийн ангалд живүүлж байна. Авлигатай тэмцэх асуудал буурсангүй. Үндсэн хуулийн цэц нь авлига авдаг сайд нь өрөөндөө авлига авдаг зэрэг асуудал буурахгүй байна гэлээ.
Үүний дараагаар бүлгийн дэд дарга Д.Хаянхярваа “УИХ-ын дарга чуулганы хуралдааны үеэр хэтэрхий дарангуйлж ханддаг. Гишүүдэд түрэмгий байдаг. УИХ-ын даргын ёс зүйд баймгүй үйлдлийг гаргаж байгаа. Энэ нь сүүлийн үед их нэмэгдэж байна гэдгийг гишүүд шүүмжилж байна. Тийм учраас бид УИХ-ын даргад шаардлага хүргүүлэхээр шийдвэрлэсэн. Төрийн байгуулалтын байнгын хорооны хурлын ирц бүрдээгүй. Гэтэл Төрийн байгуулалтын байнгын хорооны гишүүдийн ирцийг бүрдүүлэхийн тулд онгоцон дотор явсан хүнийг чөлөөлж, өөр гишүүнийг томилуулсан хууль бус үйлдэл хийсэн. Өөрөөр хэлбэл Н.Батцэрэг гишүүнийг Туркээс Сөүл рүү явж байх хооронд Төрийн байгуулалтын байнгын хорооны гишүүнээс нь чөлөөлж, түүний оронд Г.Батхүү гишүүнийг томилсон хууль бус үйлдэл хийсэн. Энэ мэтчлэн хуулийн олон зүйл заалтыг зөрчиж байна. Тавантолгойн асуудлыг өнөөдрийг хүртэл гацааж байгаа. Үр дүнг нь үзэж чадахгүй, нүүрс үнс болж, эдийн засаг муудсан. Ипотекийн зээлийг Монгол банкны Ерөнхийлөгч, Ерөнхий сайдын нэрийн өмнөөс ярьж, банкны хүү тогтоох тухай асуудлыг өөрөө хийж байгаа мэтээр олон түмэнд харуулж байна. Энэ бүхэн хэт дураараа авирлаж байгаа асуудал юм. УИХ-ын дарга эрх хэмжээнийхээ хүрээнд УИХ болоод бусад хуульд захирагдаж үйл ажиллагаа явуулах ёстой. Ингэж ажиллахдаа УИХ-д сонгогдсон гишүүдийн нам, эвсэл холбоог ялгаварлан гадуурхаж харьцах ёсгүй. Тийм учраас УИХ-ын даргын авир хэрээс хэтэрч байна гэж үзээд сайн дураараа албан тушаалаасаа огцрох шаардлагыг УИХ-ын даргад хүргүүлэхээр шийдсэн. Үүнийг энэ долоо хоногт багтааж УИХ-ын даргад хүргүүлнэ хэмээн мэдээллээ. Тэд мэдээлэл хийснийхээ дараа сэтгүүлчдийн сонирхсон асуултад хариулсан юм.
Н.Энх