Ардчилсан намын дарга Н.Алтанхуяг, генсек Б.Эрдэнэбат, бүлгийн дарга Ч.Сайханбилэг нар хамтарсан Засгийн газраас гарах мэдэгдэл хийсэн. Харин энэ шийдвэрийг тэдгээр гурван хүн гаргах бус Ардчилсан намын ҮЗХ хуралдаж шийдэх асуудал ажээ.
Хувийн тоглолт хийж бусдын өмнөөс шийдвэр гаргасанд нь гишүүд нь дургүйлхэж ардчилсан намын дарга Н.Алтанхуяг ихээхэн эвгүй байдалд ороод байгаа ажээ.
Ардчилсан намын удирдах албан тушаалтан болох гурван хүн Засгийн газраас гарах тухай мэдэгдэл хийсэн нь араасаа ихээхэн хэл ам дагуулж байна. Ардчилсан нам Засгийн газраас гарах нь тодорхой гэнэ. Гэхдээ ямар шалтгаанаар яаж хэзээ гэдэг асуудлыг шийдэлгүй хувийн тоглолт хийж буй намын удирдах албан тушаалтнууд нь банга хүртжээ.
Баярын стандарт бус хэмээн зарласан Засгийн газарт орох эсэх асуудлыг Ардчилсан намын ҮЗХ шөнө өдөргүй хуралдаж хэлэлцэж мэтгэлцэж байж шийдсэн бол харин гарах асуудлыг гурван хүн сууж байгаад шийдэж байгаа нь хардалт дагуулж байна.
Намын дарга нь өөрөө яг юунаас болж Засгаас гарахаа ч ойлгохгүйгээр ам мэдэн бурсан нь асуудал дагуулжээ. Ардчилсан намаас ЗТБХБЯ-ны сайдаар томилогдсон Х.Баттулга Засгийн газрын хаалттай хуралдаан дээр Ц.Нямдоржтой хэрэлдэж маргалдсан нь Н.Алтанхуягийг ийм мэдэгдэл хийхэд хүргэсэн гэсэн яриа ордноор нэг тархсан байна.
Хаалттай хуралдсан Засгийн газрын хуралдаан дээр баахан маргаан болсон тухай мөн л саарал ордноор нэг яригдаж байна. Бүхэл бүтэн аж үйлдвэрийн цогцолборыг бий болгох томоохон бүтээн байгуулалтын төслүүдийн санхүүжилтийг зогсоож, хуруугаа ч хөдөлгүйгүй байгаад бачуурсан Х.Баттулга сайд “Ингэж хамтарч ажиллдаг юм уу, чадахгүй бол энэ засгаас чинь гарлаа” гэж баахан агсамнажээ.
Харин хариуд нь Ц.Нямдорж “ Чадал чинь хүрээгүй бол хохь чинь” хэмээн тавлажээ. Энэ хэрүүлээс улбаалан Х.Баттулга сайд Засгийн газраас гарна, төслүүдийг зогсоож байгаа бол надад энд байх шаардлагагүй хэмээн хэлжээ. Энэ үгнээс ишлэл авсан намын дарга нь ямар ч зөвшил хийлгүйгээр, гарах шалтгаан нь юуг ч мэдэлгүйгээр ҮЗХ ны хурлын товыг ч зарлаагүй байхад олон нийтэд мэдэгдэл хийж орхижээ. Намын даргын мэдэгдэл хийснээр засгийн газраас гарах асуудал шийдэгдэхгүй, харин ҮЗХ хуралдаж байж энэ асуудалд шийдвэр гарна гэдгийг намын гишүүд нь ярьж байна.
Ж.Булган