АН, ИЗНН-тай нэгдэх санамж бичигт өнөөдөр гарын үсэг зурсан. Гарын үсэг зурах ёслолын дараагаар АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяраас зарим зүйлийг тодрууллаа.
-Танай намын зүгээс ИЗНН, МҮАН-тай эвсэх биш нэгдэх санал тавьсан шалтгаан нь юу вэ?
-Манай хоёр намын эрхэм зүйл нь адилхан. Монгол улсад ардчиллын эрхэм зүйлүүдийг баталгаажуулах асуудалд анхнаасаа нэг зорилготой явж ирсэн. Нэг нам нь байхгүй болно гэдэг талаас нь бид харахгүй байгаа. Харин бид илүү хүчтэй, эв нэгдэлтэй болно гэж харж байгаа.
- Нэгдэх асуудлаар хоёр намын дарга нарын хооронд ямар тохироо хийгдэх бол?
-Хоёр нам нэгдлээ гэхэд ИЗНН-аас орж ирэх гишүүдээ АН-ын ҮЗХ-нд яаж оруулах вэ. Орон нутагт хамтрах асуудлаа яаж шийдэх вэ гэх зэрэг зохицуулах ёстой нарийн асуудлууд байгаа.
- Хоёр нам нэгдэхэд АН үндсэн дүрэмдээ өөрчлөлт оруулах уу?
-Улс төрийн намын тухай хуулинд “Хоёр нам нэгдсэн тохиолдолд хоёулаа их хурлаараа асуудлаа шийднэ” гэж заасан байдаг. Тэгэхээр дүрэм бол хууль давахгүй. Улс төрийн намын тухай хуулиараа шийдвэрлэнэ. Дүрэмд өөрчлөлт оруулах шаардлага байхгүй гэж харсан.
- Нэрэнд өөрчлөлт орох уу?
- Хоёр нам нэгдвэл АН-аар нэрлэгдэх байх. Бид тэр байдлаар хоорондоо тохирч байна.
- МҮАН-тай нэгдэх асуудал хэр түвшинд явж байна?
- Ажил өрнөж байна. МҮАН-ын дарга нар эзгүй байгаа. Тэднийг ирэхээр уг асуудлаар ярилцана. Бид нэгдэх асуудлаа уламжилсан байгаа.
- ҮЗХ хэзээ хуралдах бол?
- ҮЗХ Цагаан сарын баярын дараа хуралдана. Уг хурлаар бусад намуудтай нэгдэх асуудлаар ярилцана.
Н.Энх
Уншиж байна |