МАХН-ын санхүү хариуцсан нарийн бичгийн дарга П.Цогтбаатарыг өчигдөр орой 17:00 цагийн үед АТГ-аас баривчлан Цагдан хорих төвд хорьжээ. Учир нь тус намын ерөнхий нарийн бичгийн дарга Г.Шийлэгдамбын авлигын хэрэгтэй холбогдуулан баривчилсан гэнэ. 

Эргэн сануулахад, өнгөрсөн оны арваннэгдүгээр сарын 04-нд АТГ-аас Г.Шийлэгдамбыг Цагдан хорих 461 дүгээр ангид баривчилж, саатуулсан. Түүнийг яаман дээрээ байхад нь АТГ-ын албан хаагчид байцаалт авна хэмээн авч явсан бөгөөд орой 22.00 цагийн орчимд саатуулсан байдаг. Тэрбээр ажлынхаа өрөөнд 500 гаруй сая төгрөгийн авлига авч байгаад үйлдэл дээрээ баригдсан гэдэг. 

Улмаар баривчлан саатуулах 60 хоногийн хугацаа дуусч шинэ он гарахын өмнө буюу арванхоёрдугаар сарын 31-нд батлан даалтад гарсан. Үүний дараа мөрдөн байцаалтад, батлан даалтад байгаа ч хэвлэлээр ярилцлага өгч шуугиан дэгдээгээд авсан. Тэгвэл энэхүү хэрэгтэй холбоотойгоор АТГ-аас тус намын хэд, хэдэн албан тушаалтнаас байцаалт авсан. Харин энэ удаа санхүү хариуцсан нарийн бичгийн даргыг нь хорьсон нь олон хүний анхаарлыг татаад байна.

Эх сурвалж: www.mminfo.mn