"Шилэн" Цогоо шинийн 15-ны сайн өдрийг сонгож, улсын ерөнхий аудитороор сор заллаа. Тэрбээр шилэн дансны хуулийн хэрэгжилтийн талаар аудитын байгууллагад өргөдөл гаргаад байсан юм. Харин түүний өргөдлийн хариуг өгөхгүй удаасан нь Ерөнхий аудитор А.Зангадын дүрсээр сор залах шалтгаан болжээ.
Б.Цогтгэрэл аудитын байгууллагаас өнөөдөр өргөдлийн хариугаа авсан бөгөөд энэ үеэрээ сор залах үйлдлийг хийсэн байна. Тэрбээр "Өнөөдөр шинийн 15-ны билэгт сайн өдөр. Энэ билэгт сайн өдөр монголын ард түмний татвараар үйл ажиллагаа явуулж байгаа. Монгол төрийн байгууллагад шигдэж, хүнд суртал гаргаж байгаа нөхдүүдийг үтэр түргэн зайлуулахын тулд энэ хүмүүсийн дүрээр сор залж байна. Энэ нь монгол төрийг цэвэр ариун болгох, хүнд суртлыг устгаж үгүй болгох зорилготой" гэжээ.