АНУ болон ОХУ-ын удирдагчид Сирийн асуудлаар утсаар ярилцжээ. Энэ талаар “www.telegraph.co.uk” мэдээллээ.

Сирид гарч буй цуст мөргөлдөөнийг зогсоохын тулд АНУ болон ОХУ-ын эрх баригчид нэгдэж хамтарсан мэдэгдэл гаргалаа. ОХУ-ын Ерөнхийлөгч В.Путин Вашингтоны санаачилсан “Сирид гал зогсоох хэлэлцээр”-ийг дэмжиж, хамтран ажиллахаа мэдэгдсэн байна. Удирдагчид өчигдөр Сирийн асуудлаар ярилцаж, өөрсийн байр сууриа хүргэжээ.

Энэ талаар Путин мэдэгдсэн бөгөөд тэрбээр “Би сая Ерөнхийлөгч Обаматай Сирийн асуудлаар ярилцлаа. АНУ-ын баталсан төлөвлөгөөг Орос дагахаа мэдэгдэж байна. Миний бие Обаматай ярилцах санал гаргасан. Хоёр улс Сирийн асуудалд гол анхаарлаа хандуулан, тус улсыг хямралаас гаргах асуудлаар хамтрах болно. Өнөөдрөөс Сирийн тусгаар тогтнолыг хамгаалахын тулд ОХУ, АНУ хамтран ажиллах болно. Гал зогсоох хэлэлцээрийг хэрэгжүүлэхийн тулд энэ сарын 27-ны шөнө Орос хилийн чанд дахь байлдааны ажиллагаагаа зогсоох болно. Олон улс энэхүү хэлэлцээрийг ажил хэрэг болгохын тулд буулт хийх хэрэгтэй” гэж хэлжээ.

“АНУ болон ОХУ байлдааны ажиллагаа зэрэг зогсоохоор тохиролцсон” хэмээн Кремлийн хэвлэлийн албанаас уламжлав. Орос болон АНУ тэргүүтэй олон улсын эвсэл /24 улс/ өнөөг хүртэл Сирид агаараас цохилт өгсөөр байна.  

Путин ийнхүү Сирийн төлөө Обаматай гар барьж, буулт хийлээ. Путиний бодол ийнхүү өөрчлөгдсөн шалтгаан энэ амралтын өдөр болсон цуврал халдлагатай холбоотой гэнэ. Сирийн нийслэл Дамаск болон Хомс хотноо ням гаригт Иракийн хэт даврагч “Халифын вант улс” бүлэглэл дараалласан халдлага зохион байгуулж, 140 хүний аминд хүрчээ. Ойролцоогоор долоон дэлбэрэлт болсон бөгөөд хэт даврагчид уурхайн тэслэгч  ашигласан байна. “Уг халдлагад амиа золиослогч этгээд оролцоогүй” хэмээн Дамаскийн Цагдаагийн газраас мэдээлэв. Цагдаагийнхан амиа алдагсдын тоог мэдээлсний дараа хэт даврагчид өөрийн твиттер хуудсаараа дамжуулан Дамаск, Хомсын халдлагыг захиалсан болохоо мэдэгдэж “Хэн ч биднийг зогсоож чадахгүй. Та нар галт зэвсгээсээ татгалзвал бид та нарыг устгах болно” гэж жиргэсэн байна.

Сирид гал зогсоох хэлэлцээрийг Москва дагахаа мэдэгдсэн ч Вашингтон, Сирид гал зогсох хүндрэлтэй байгааг мэдэгдлээ. “Иракийн хэт даврагч “Халифын вант улс” бүлэглэл болон 20 гаруй зэвсэгт бүлэглэл Сирид байршиж, алан хядах ажиллагаа явуулж байна. Олон улс цэргийн ажиллагаагаа зогсоовол хэт даврагчид аюулгүй бүс рүү халдаж болзошгүй. Вашингтон энэ асуудлаар судалгаа явуулж байна. Гэхдээ Сирид гал зогсох магадлал тун бага байна” хэмээн Обамагийн хэвлэлийн төлөөлөгч Жон Эрнест мэдэгджээ.

Энэхүү асуудалд Путин хариулахдаа “Хэдий Сирид гал зогссон ч “Халифын вант улс” бүлэглэл болон “Жебхат-ан-Нусра” бүлэглэлийн эсрэг цэргийн ажиллагаа зогсохгүй. Эдгээр бүлэглэлийн эсрэг цэргийн ажиллагааг төлөвлөгөөний дагуу үргэлжлүүлсээр байх болно. Тэдний эсрэг гал зогсохгүй” гэсэн байна.

Олон улсын хүсэлтийн дагуу Сирийн Засгийн газар болон сөрөг хүчний удирдагч хэлэлцээр байгуулсан юм. Уг хэлэлцээрийн дагуу олон улсын тусламжийн цуваа Сирийн зарим бүс нутагт нэвтэрсэн билээ. Хэлэлцээрийн хүчинтэй хугацаа хоёр долоо хоног. Сирийн Үндэсний эвслийн Ерөнхийлөгч Халед Хожа “Гэрээний хугацааг сунгах бүрэн боломжтой” гэж мэдэгджээ. Хэдий сөрөг хүчин энэхүү гэрээг дэмжиж байгаа ч “Засгийн газар  хүндэтгэлгүй хандаж байна” хэмээн мэдэгджээ.

Женев хотноо энэ сарын 25-нд Сирийн асуудлаарх НҮБ болон олон улсын форум уулзалт дахин зохион байгуулагдах юм. Уг уулзалт энэ сарын 3-нд эхэлсэн ч хоёр өдрийн дараа тодорхой хугацаагаар хойшилсон билээ.

Б.Дэлгэрцэцэг