Сүүлийн 4 жилийн хугацаанд замын хөдөлгөөнд оролцоогүй 97 мянга гаруй тээврийн хэрэгслийг улсын бүртгэлээс хасахаар болжээ. Энэ талаар Авто тээврийн үндэсний төвийн Техник хяналт, бүртгэл хариуцсан дэд захирал Т.Баясгалангаас тодрууллаа.
-Замын хөдөлгөөнд оролцоогүй удсан, татвараа төлөөгүй тээврийн хэрэгслийг улсын бүртгэлээс хасахаар болжээ. Энэ талаар тодруулахгүй юу?
-Замын хөдөлгөөнд оролцоогүй удсан тээврийн хэрэгсэл буюу сүүлийн дөрвөн жил 2012-2015 онд техникийн хяналтын үзлэгт ороогүй автомашины улсын дугаарыг улсын бүртгэлээс хасахаар болсон. Мөн манай улсын хилээр гараад эргэж орж ирээгүй тээврийн хэрэгслийг хасах юм. Түүнчлэн бүртгэлтэй, татвар төлсөн, техникийн үзлэгт орсон тээврийн хэрэгслийн зөрүүтэй тоог цэгцэлнэ.
-Тээврийн хэрэгслүүдийг бүртгэлээс хасах зайлшгүй шаардлага юу байв?
-Бүртгэл мэдээллийн цахим санд 790 орчим мянган тээврийн хэрэгсэл бүртгэлтэй байна. Үүний талаас илүү нь буюу 436 мянга нь нийслэл хотод бий. Гэтэл 2015 онд 510 гаруй мянган тээврийн хэрэгсэл техник хяналтын үзлэгт орсон бол 460 мянган нь татвараа төлсөн гэх мэдээлэл байна. Түүнчлэн Замын цагдаа, Татварын ерөнхий газар, Авто тээврийн үндэсний төвд бүртгэлтэй тээврийн хэрэгслийн тоо зөрдөг. Өнгөрсөн онд авто тээврийн болон өөрөө явагч хэрэгслийн албан татвараас 22.5 тэрбум төгрөгийн орлого төвлөрүүлэх үүрэг хүлээсэн. Гэсэн ч 20.5 тэрбум төгрөгийн орлого төвлөрүүлсэн байна. Төсөвт төвлөрүүлэх үүргээ тээврийн хэрэгслийн тооны зөрүүнээс шалтгаалан гүйцэтгэж чадахгүй байна. Тиймээс сүүлийн 4 жилд замын хөдөлгөөнд оролцоогүй тээврийн хэрэгслийг улсын бүртгэлээс хасахаар болсон.
-Иргэдийн зүгээс хувийн өмчийг үнэгүйдүүллээ гэж байна?
-Бүртгэлтэй, татвар төлсөн, техникийн үзлэгт орсон тээврийн хэрэгслийн зөрүүтэй тоог цэгцлэснээр төсөвт төвлөрөх татварын орлого бодитой болно гэдгийг ойлгох нь зөв.
-Бүртгэлийг эргээд сэргээх боломжтой юу?
-Боломж бий. Гэхдээ хүндэтгэх шалтгаантайгаар машинаа үзлэгт оруулаагүй, татвараа төлөөгүй, хуулиар хүлээсэн үүргээ биелүүлээгүй тохиолдолд бүртгэлийг сэргээнэ. Гэхдээ хуулиар хүлээсэн үүргээ биелүүлээгүй учраас торгууль, ногдуулах, татварыг нь төлүүлэх ажил хийгдэх юм.
-Нийт хичнээн машин улсын бүртгэлээс хасагдах тооцоо байна вэ?
-Улсын хэмжээнд 105 гаруй мянган тээврийн хэрэгслийг бүртгэлээс хасах тооцоо гараад байна. Тухайлбал сүүлийн дөрвөн жил татвараа төлөөгүй 97.770 тээврийн хэрэгсэл байгаа бол хилээр гараад эргэж ирээгүй 10 мянга орчим тээврийн хэрэгсэл байна.
Г.Тэгшсүрэн
Уншиж байна |