УИХ-ын гишүүн О.Баасанхүү Ерөнхий сайд Ч.Сайханбилэгийг халз мэтгэлцээнд дуудаж буйгаа хэвлэлийн бага хурлынхаа үеэр мэдээлсэн. Харин ЗГХЭГ-аас уг мэтгэлцээний урилгыг хүлээж авах боломжгүй гэдгээ илэрхийлсэн аж. Тэгвэл уг асуудлаар Монголын ногоон намаас өнөөдөр мэдээлэл хийж, байр сууриа илэрхийллээ.

Энэ үеэр МНН-ын дарга О.Бум-Ялагч “УИХ-ын гишүүн О.Баасанхүү бүрэн эрхийнхээ дагуу хуулийн төслүүд санаачлан Засгийн газраас санал авахаар албан бичгүүдийг хүргүүлсэн ч тухай бүрт нь Засгийн газрын Хэрэг эрхлэх газраас түүний санаачилсан хуулийн төслүүдийг хүлээн зөвшөөрөх боломжгүй хэмээн мэдэгдсэн байдаг. Улмаар Засгийн газрын албан ёсны байр суурийг няцааж, ард түмэнд бодит мэдээлийг өгөх зорилгоор гишүүн О.Баасанхүү Ерөнхий сайд Ч.Сайханбилэгийг олон нийтийн өмнө халз мэтгэлцээнд дуудаж буйгаа илэрхийлсэн. Харамсалтай нь бидэнд ирсэн мэдээллээр Ерөнхий сайд уг мэтгэлцээнээс татгалзаж магадгүй байна. Энэ удаагийн мэтгэлцээнд О.Баасанхүү илт давуу ялалт байгуулах юм бол түүний нийгэмд эзлэх нэр хүнд өснө. С.Баярцогт, С.Ганбаатар нарын мэтгэлцээний дараа С.Ганбаатарын нэр хүнд өссөн шиг О.Баасанхүүгийн рейтинг өсөх өндөр магадлалтай. Магадгүй Ерөнхий сайдын зүгээс үүнээс эмээж байгаа бололтой. Товчхондоо Ч.Сайханбилэг тэргүүтнүүд О.Баасанхүүгээс айж байна. Бидний тухайд энэ мэтгэлцээнийг дэмжиж байгаа. Учир нь мэтгэлцээн гэдэг бол ардчилсан засаглалтай оронд хамгийн эрүүл үзэгдэл” хэмээлээ.

Р.Улам