АНУ болон Өмнөд Солонгосын цэргийн хамтарсан сургуулилт орон нутгийн цагаар 9.00 цагт Солонгосын хойгт эхэлсэн талаар “www.yonhapnews.co.kr” мэдээллээ. Энэ жилийн сургуулилтад Өмнөдийн 300 мянган цэрэг, Америкийн 15 мянган албан хаагч оролцож байна.
Сөүлийн талаас мэдээлснээр “Цэргийн сургуулилтад оролцох албан хаагчдын тоо өнгөрсөн оныхтой харьцуулахад хоёр дахин их” гэжээ. Вашигтон сургуулилтад оролцох цэргийн албан хаагчдын тоог нэмсэн шалтгаанаа “Хойд Солонгосоос ирэх аюулыг багасгахын тулд” гэсэн аж.
Цэргийн сургуулилт болох бүс нутгуудад техник, төхөөрөмж байршсаны дараа Пхеньян хилийн хамгаалалтаа нэмэгдүүлж, дайны бэлэн байдалд шилжсэн юм. Мөн удирдагч Ким Чен Ун цэргийн сургуулилтыг нэн даруй зогсоохгүй бол цөмийн туршилт хийхээ сануулсан билээ.
Солонгосын хойгт хоёр улсын хамтарсан цэргийн сургуулилт эхэлж, их бууны ангийнхан гал нээсний дараа Пхеньян мэдэгдэл хийжээ. Уг мэдэгдэлд “Хойд Солонгос улс энэхүү цэргийн сургуулилтыг дайныг өдөөн турхирсан үйлдэл хэмээн үзэж байна. Хэрвээ цэргийн сургуулилт үргэлжилсээр байвал Америкийн цэргийн баазуудыг устгаж, ихээхэн гарз учруулах болно” гэжээ.
Б.Дэлгэрцэцэг