Олон нийтийн цахим хуудас болон зарим мэдээллийн сайтаар "Хоёр хүүхдээ дагуулаад зам гарч явсан аавыг, зам тавьж өгөөгүйн улмаас зоджээ" гэсэн мэдээлэл гарсан.
Тэгвэл уг хэргийг Сүхбаатар дүүрэг дэх цагдаагийн хоёрдугаар хэлтэст шалгаж эхэлсэн байна. Энэ сарын 9-ний өдрийн 18:00 цагийн үед Сүхбаатар дүүргийн цагдаагийн хоёрдугаар хэлтсийн хэв журмын алба хаагчид эргүүлийн үүрэг гүйцэтгэж байхад дээрх хэрэг, зөрчил гарчээ. Сүхбаатар дүүргийн 11 дүгээр хороонд суух 38 настай, эрэгтэй М-ийг, Хан-Уул дүүргийн 11 дүгээр хороонд оршин суух хаягтай 40 настай, эрэгтэй Х нь маргалдаж, зодож танхайрч байсныг таслан зогсоосон байна.
Иргэн М гарцгүй газраар зам хөндлөн гарч, зам тавьж өгөөгүй жолооч Х-ийн автомашиныг өшиглөж, маргаан үүсгэсний улмаас уг хэрэг үүджээ.
Иймэрхүү маргаан цөөнгүй удаа гарч, цагдаагийн байгууллагад шалгагдаж байна. Тиймээс явган зорчигч, жолооч нар замын хөдөлгөөний хууль, дүрмээ баримтлан замын хөдөлгөөнд оролцох хэрэгтэй юм.
Б.Хүлэг