Нийслэлийн ерөнхий боловсролын сургуулиудын багш нар өнөөдөр сэтгүүлчдэд мэдээлэл хийлээ. Энэ үеэр 14 дүгээр сургуулийн 1Е ангийн багш Д.Ганцэцэгээс дараах тодруулгыг авлаа.
-Шинэчилсэн хөтөлбөрөөр “Иргэний боловсрол” хичээлийг нэгдүгээр ангийн сурагчдад заадаг болсон. Гэтэл “Иргэн гэж хэн бэ” гээд зургаан настай хүүхдээс асуухаар хариулт өгч чадахгүй байна.
-Энэ хичээл зайлшгүй орох нь зөв. Багш нар математик, монгол хэл гээд л явчихдаг. Гэтэл хүүхдийн төлөвшил чухал шүү дээ. Бид хүүхдийнхээ төлөвшилд анхаардаггүй байсан бол “Иргэний боловсрол”-ын цаг дээр хүүхдээ сонсох ёстой, өөрийгөө илэрхийлэх чадварт суралцах цаг гаргаж өгөх нь зөв гэдгийг олж харсан. Хүүхдүүд энэ хичээлийн цагт аль нэг зүйлийг бодож толгойгоо өвтгөхгүй, буруу хариулчих болов уу гэж айж эмээхгүй. Өөрийгөө нээлттэй илэрхийлэх чадварт суралцдаг юм.
-Энэ хичээлээр юу заадаг вэ?
-“Иргэний боловсрол” хичээл ЕБС-ийн хөтөлбөрийн нэг хэсэг болсонд би эх хүн, багш хүний хувьд баяртай байна. Яагаад гэхээр би ээжийгээ гомдоож болохгүй, аавыгаа хайрлах ёстой юм байна гэдэг үгийг ээж, аав нь хэлдэг, сонсдог байсан. Аав нь жирийн нэг жолооч байлаа гэхэд хүүхэд жаахан болохоороо аав баян, мөнгөтэй эсвэл том дарга байх ёстой гэж ойлгодог. Гэтэл аавыгаа байгаагаар нь хайрлах л чухал юм байна гэдэг ойлголтыг хүүхдүүд минь ойлгож, мэдэж авч байгаа болохоор энэ зөв хичээл.
-“Иргэний боловсрол”-ын номонд ийм жишээ байгаа юм. “Бат ногоон гэрэл дөнгөж асангуут замаар гартал машинд дайруулах шахав”. Энэ жишээнээс харахад ногоон гэрлээр гарсан ч машинд дайруулж болзошгүй юм байна гэж хүүхэд ойлгож болохоор байна.
-Ногоон гэрэл ассан байлаа ч автомашин туслах замаас орж ирэх зэрэг асуудал байдаг шүү дээ. Тиймээс зам хөндлөн гарахдаа гэрэл ассан эсэхийг сайтар анхаарч, анхаарал болгоомжтой гарах ёстой гэсэн сануулга. “Иргэний боловсрол” гэдэг маш гайхалтай хичээл л гэж хэлмээр байна. Байгаль дэлхийгээ хайрлаж хамгаалдаг, эх орондоо хайртай тийм л иргэн болгож төлөвшүүлэхэд хичээлийн зорилго оршдог.
-Зургаан настай хүүхэд “Иргэний боловсрол” гэдгийг яаж ойлгодог юм бэ?
-Анх хичээл ороход дуугарахгүй, гайхаад л, жаахан эмээдэг байсан. Одоо бол өөрийнхөө л бодлыг ярь гэхээр их хөөрхөн зүйлсийг ярьдаг. Түүн дээр тулгуурлан зөв хүн болж төлөвших дадлыг суулгаж өгдөг юм. Ерөөсөө тэр цаг дээр хүүхдээ сонсох ёстой юм байна гэдгийг багш нар мэдэж авсан. Тийм ч болохоор багш нар энэ хичээлийг орох дуртай. Хүүхэд ч хичээллэх дуртай байдаг юм. Тоо бодох дуртай ч хүүхэд байна, дургүй ч хүүхэд байна.
-Олон нийтийн сүлжээгээр Мүүний шашны нөлөө боловсролын хөтөлбөрт орсон талаар ярьж байна.
-Цахим сүлжээгэээр яриад, бичээд байгаа шиг зүйл байхгүй. Тэр номын зургийг нь бид харсан. Аливаа юмыг шинжлэн судлах хэрэгтэй. Олон нийтийн сүлжээнд тавигдсан номнууд сургалтын хөтөлбөрт огт ашиглагддаггүй. Мүүн ч байна уу аль нэг шашны нөлөө боловсролын хөтөлбөрт ороогүй, орох боломж ч байхгүй.
Г.Тэгшсүрэн