Их эзэн Чингис хааны үеэс түүхийн бүхий л үеийн туршид эх орныхоо тусгаар тогтнол, аюулгүй байдлын төлөө халуун амь, бүлээн цусаа үл хайрлан тэмцэж ирсэн “Монгол цэрэг”-ийн баатарлаг тэмцэл нь туурга тусгаар эх орны маань тусгаар тогтнолын баталгаа болсоор ирсэн билээ. 

Энэ л түүхийн жимийн нэг чухал үе болох 1921 оны 3 дугаар сарын 18-ны өдөр байгуулсан Монгол ардын журамт цэргийн анхны ялалтын өдөр, орчин үеийн Зэвсэгт хүчний үүсч хөгжсөний 95 жилийн ой, “Монгол Цэргийн өдөр” тохиож байна. Өнөөдөр "Улаанбаатар" цэргийн хүрээний анги, байгууллагын үлээвэр хөгжимчдийн хөгжимтэй жагсаал нийслэлийн таван цэгээс жанжин Д.Сүхбаатарын талбайд боллоо. 

Ёслолын ажиллагаанд Батлан хамгаалахын сайд Ц.Цолмон оролцож, жанжин Д.Сүхбаатарын хөшөөнд цэцэг өргөж, хүндэтгэл үзүүлсэн юм. 

Цэргийн хөгжмийн албаны дарга, хурандаа Ч.Гансүх "Хөгжимтэй парад гэдэг бол ард түмнийг хөглөх, марш бол баяр жавхлан, баяр баясгалан, өөдрөг золбоолог хийморилог эх оронч үзэл төлөвшүүлэх гээд маш их ач холбогдолтой байдаг. Манай цэргийн хөгжимчид анх удаа таван зүгээс тоглож төв талбайдаа орж ирлээ. Энэ сайхан баярын өдрөөрөө хөгжмтэйгөө талбай дээр ирж зогсоно гэдэг бол манай хөгжимчдийн хувьд нэр төрийн асуудал болж байна" гэж ярилаа. 

Монгол цэргийн өдрийн баярын хурал Соёлын төв өргөөний Их танхимд үргэлжилж байна. 

Б.Хүлэг