УИХ-ын ээлжит бус чуулганы хуралдаанаар цөмийн хаягдлыг булшлахгүй байх олон улсын гэрээнд нэгдэх асуудал хэлэлцэх байсан ч МАН гишүүд хуралдаа ирсэнгүй. Ашигласан түлшний болон цацраг идэвхт хаягдлын менежментийн аюулгүй ажиллагааны тухай 1997 оны конвенцид нэгдэн орох тухай хуулийн төслийг баталсан бол манай улс цөмийн хог хаягдлыг улсдаа оруулахгүй байхад олон улсад үүрэг хүлээх байлаа. Уг конвенцид “...Цацраг идэвхт хаягдлыг тухайн материалын менежментийн аюулгүй ажиллагааг харгалзан үүссэн улсад нь булшлах ёстой гэдэгт итгэлтэй байна...”, “Аливаа улс бусад улсад ашигласан түлш болон цараг идэвхт хаягдлыг өөрийн нутаг дэвсгэрт импортоор оруулахыг хориглох эрхтэйг хүлээн зөвшөөрч...” гэж заасан байгаа. Өөрөөр хэлбэл, конвенцид нэгдэл Монгол Улсад бусад улс орон цөмийн хаягдал булшлах эрхгүй болох юм. Мөн цөмийн хаягдал, шаарыг үйлдвэрлэсэн орон нь өөрийнхөө нутаг дэвсгэрт булшлахыг  заажээ.

Олон улсын конвенц хуулийн нэгэн адил үйлчилдэг, элссэн улс бүр дагаж мөрдөх үүрэг хүлээдэг. Манай улс конвенцид нэгдэх эрх энэ сарын 31, дөрөвдүгээр сарын 1-нд АНУ-ын Вашингтон хотноо болох Цөмийн аж үйлдвэрийн дээд хэмжээний чуулга уулзалтын үеэр бүрдэх байлаа. Тиймээс ээлжит бус чуулганы хуралдаанаар уг асуудлыг хэлэцэхээр товлосон. Гэвч МАН-ынхан урьдынх шигээ ирцээр бойкот хийж хуралдаа суусангүй. МАН-ын улстөржилтөөс болж манай улс конвенцид нэгдэх асуудал хойшилж байгаа бололтой.