УИХ дахь МАН-ын бүлгээс УИХ-ын дарга З.Энхболдыг сайн дураараа албан тушаалаасаа огцрох шаардлага хүргүүлсэн. Үүнтэй холбогдуулан АН-аас хэвлэлийн бага хурал хийлээ. АН-ын Ерөнхий нарийн бичгийн дарга Л.Эрхэмбаяр, УИХ дахь АН-ын бүлгийн дарга Б.Гарамгайбаатар нар мэдээлэл хийсэн юм. АН-ын Ерөнхий нарийн бичгийн дарга Л.Эрхэмбаяр:
-УИХ-ын дарга, АН-ын дарга З.Энхболдыг албан тушаалаасаа сайн дураараа татгалзахыг УИХ дахь МАН-ын бүлгээс шаарджээ. Энэ шаардлагатай бид танилцаж үзлээ. МАН-ын бүлгийн хувьд хувь хүн рүү дайрсан, З.Энхболд даргыг гутаан доромжлох агуулгатай нь шаардлагаас харагдаж байна. Жишээ нь, Монгол Улс цөмийн хаягдал, цацраг идэвхит бодис нэвтрүүлэхийг хориглох тухай хууль батлах гэхэд МАН-ынхан БНХАУ-ын Комуннист намынхантай уулзалт хийж, ээлжит бус чуулганыг санаатайгаар тасалдуулснаа цайруулахыг оролджээ. УИХ-ын даргыг Ерөнхийлөгч, Ерөнхий сайдын бүрэн эрхэд халдсан гэж үзэн хооронд нь хагалган бутаргахыг оролдсон санаа агуулжээ.
МАН-ын бүлгээс АН-ын даргыг улсаа өрийн дарамтад оруулсан гэсэн байна. Үнэндээ, МАН-ын үед авсан зээлээ үр ашиггүй тараасан, халамжийг тэтгэсэн бодлого явуулсан. АН-ын үед авсан зээл бүтээн байгуулалт болсныг ард түмэн харж байгаа. Барилгын үнэ, зээлийн хүүг өрөөндөө тогтоосон гэж шаардлагадаа дурджээ. Ард иргэдэд хямд, бага хүүтэй орон сууцжуулах гэсэн нь МАН-ын бүлгийнхний хэлж байгаагаар хариуцлага тооцох хэрэг болж байна.
Иргэдээ хямд орон сууцтай болгох үйл хэргээсээ АН ухрахгүй. УИХ-ын дарга Тавантолгойг ард түмнийхээ талд авч үлдсэний төлөө ийм шаардлага тавьж байна. Ард түмний Таван толгой ард түмэндээ үлдэх ёстой.
Сонгууль дөхсөн энэ үед улс төрийн оноо цуглуулах гэж төрийг тогтворгүй байдал руу турхирсан энэ явуургүй үйлдлээ зогсоохыг УИХ дахь МАН-ын бүлгээс эргүүлж шаардаж байна гэлээ.
Н.Энх
Уншиж байна |