УИХ-ын чуулганы нэгдсэн хуралдаанаар Сонгогдсон болон томилогдсон төрийн өндөр албан тушаалтанд хариуцлага хүлээлгэх тухай болон холбогдох бусад хуулийн төслүүдийн хэлэлцэх эсэхийг шийдлээ. Байнгын хороо уг хуулийн төслийг хэлэлцэхийг дэмжээгүй байна. Хэлэлцэж байгаа асуудалтай холбогдуулан гишүүд асуулт тавьж, үг хэлсэн юм.
УИХ-ын гишүүн Д.Сарангэрэл:
-Хуулийн төслийг дэмжиж байна. Нэг хүн хариуцлага алдсаны төлөө салбарын хэмжээнд буруутгаж болохгүй. Мөн үүнд ёсзүйн чиглэлийн заалт оруулах хэрэгтэй. Тухайлбал манай хэвлэл мэдээллийн байгууллагад хариуцлага алдсан болд сонин хэвлэл, телевизээрээ дамжуулж уучлал гуйдаг. Тиймээс үүнд ёсзүйн талын асуудлыг тусгах хэрэгтэй.
УИХ-ын гишүүн З.Баянсэлэнгэ:
-Энэ хуулийн төсөлд парламентын бүрэн эрхийн хугацаа хэрэгжсэн 1 жилийн хугацаанд, бүрэн эрхийн хугацааны сүүлийн 1 жилд УИХ-ын гишүүнийг эгүүлэн татах асуудлыг хэлэлцэхгүй гэж байна. Гэтэл энэ хугацаанд гишүүн хариуцлага алдвал яах вэ? Цаашлаад УИХ-ын гишүүнийг өрсөлдсөн нэгэн нь эгүүлэн татах асуудлыг зохион байгуулахгүй гэжээ. Гэтэл өрсөлдөгч өөр хүнээр УИХ-ын гишүүний эгүүлэн татах асуудлыг зохион байгуулж хийлгэвэл яах вэ? Хуулийн төсөлд энэ мэт хэлбэрдсэн зүйл их байна. Хөрсөн дээрээ буугаагүй, бодит амьдралд хэрэгжих боломжгүй байна.
УИХ-ын гишүүн Г.Уянга:
-Улс төрийн намууд аймаг, орон нутаг бүх хүнээс 50 сая төгрөг авч байна. УИХ-ын сонгуульд нэр дэвшсэн хүнээсээ 100 сая төгрөг авсан гэсэн. Улстөр мөнгөөр дамжиж гарч ирдэг тогтолцоогоо эхлээд шинэчлэх хэрэгтэй. Хариуцлага тооцох систем одоо ч үйлчилж байгаа. Энэ бол популизмын хууль. Тангарагаасаа няцсан Ерөнхийлөгчийг УИХ-ын гишүүний 3/1-ын саналаар огцруулъя гэсэн байна. Босгыг нь өндөрсгөжээ. Өнөөдөр С.Баярцогтыгоо УИХ-ын дэд даргаас нь чөлөөлөөд хариуцлага тооцоод орхие гэж болохгүй. Эрүүл мэндийн сайдаа томилж чадахгүй Ерөнхий сайддаа хариуцлага тооцъё. Улс төрийн намаа цэвэршүүлэхээс хариуцлагын системээ эхлүүлье.
УИХ-ын гишүүн Б.Ганбат:
-Би байнгын хорооны саналыг дэмжихгүй байна. Ямар хариуцлагагүй юм бэ байнгын хороо. Ерөнхийлөгчийн төслийг дэмжиж байна. Ерөнхийлөгч сахилга, хариуцлагагүй байдлыг арилгахаар оруулж ирсэн байна.
УИХ-ын гишүүн Ж.Энхбаяр:
-Томилогддог албан тушаалтанд хариуцлага тооцдог байх ёстой. Авлигатай тэмцэх, Шилэн дансны хуулийг бүрэн хэрэгжүүлэх хэрэгтэй. Улс төрийн намын хуулийг шийдэхгүйгээр ардчилал, парламент, шударга ёс гэдэг зүйлийг аварч гарч чадахгүй байна. Ард түмний санал асуулга явуулахад Ерөнхийлөгчийн засаглалыг сонгоно гэж 90 хувь нь хариулжээ. Бид парламентат засаглалаа аврах ёстой. Орон нутагт улстөржсөн байдал хэрээс хэтэрч байна. Шүүхийн шийдвэр хэрэгжихгүй, цаас болон хувирч байна.
Ийнхүү гишүүд үг хэлсний дараагаар Сонгогдсон болон томилогдсон төрийн өндөр албан тушаалтанд хариуцлага хүлээлгэх тухай болон холбогдох бусад хуулийн төслүүдийн хэлэлцэхийг дэмжихгүй гэсэн байнгын хорооны саналаар санал хураалт явууллаа. Гишүүдийн олонхийн саналаар байнгын хорооны санал дэмжигдсэнгүй. Тиймээс уг хуулийн төслийг анхны хэлэлцүүлэгт бэлтгэхээр байнгын хороонд шилжүүллээ.
Н.Энх