УИХ-ын чуулганы нэгдсэн хуралдаанаар Шадар сайд, ЭМС-ын сайдын үүрэг гүйцэтгэгч Ц.Оюунбаатар мэдээлэл хийлээ. Улаанбурхан өвчний дэгдэлт, авч байгаа арга хэмжээний талаар  хийсэн мэдээлэлдээ “Засгийн газрын тогтоолын дагуу 2015 оноос хойш 670 мянган хүүхдийг улаанбурханы эсрэг вакцинаар дархлаажууллаа. ЭМСЯ-наас мэргэжил аргазүйн зөвлөгөөг тухай бүрт нь өгсөн. Эмч, сувилагч нарыг 24 цагаар ажиллуулж байгаа. Халдварт судлалын үндэсний төвийн эмч, сувилагч нарын илүү цагийн цалинг нийлүүлсэн. Мөн тоног төхөөрөмж,  эм тариагаар хангаж байна. Энэ хүнд бэрхшээлтэй асуудлыг улстөржиж, намчирхалгүй даван туулъя” хэмээв.Мэдээллийн дараагаар гишүүд асуулт тавилаа. УИХ-ын гишүүн Ж.Батзандан:

-Эрүүл мэндийн сайдыг томилж чадахгүй удаж байна. Хичнээн хүүхэд өвчлөөд байна. Эрүүл мэндийн сайдыг яг хэзээ томилох гэж байна вэ? Эрүүл мэндийн салбарт хүн хүчний чадвар дутаад байгаа.

ЭМСЯ-ны Төрийн бичгийн дарга С.Ламбаа:

-Өнөөдрийн байдлаар 0-5 хүртэлх хүүхдийн эндэгдлийн тоо 491 байна. Эдгээр хүүхдийн 59 нь улаанбурхны сэжигтэй тохиолдлоор нас барсан. Энэ тоог нэмээд 918 гээд байна. 0-5 настай хүүхдийн эндэгдэл 484, 2014 онд 392 байсан. 2016 оны эхний улиралд 491 болж байна.

Ерөнхий сайд Ч.Сайханбилэг:

-Энэ асуудал өнөөдөр бий болсон юм биш. Сүүлийн 2-3 сарын хугацаанд  өндөржүүлсэн байдалтай ажиллаж байна. Энэ өвчний нууц үе 21 хоногоос доошгүй үргэлжилдэг. Тиймээс хөл хорио тогтоох шаардлагагүй, вакциныг нь хий гэсэн зөвлөмжийг олон улсын байгууллага өгсөн. Өнөөдөр сошиалаар хүчтэй явагдсан нь 0-2 насны эндэглийн тоог нэмж, зохион байгуулалтай арга хэмжээ явагдаж байгаа нь буруу. Тиймээс би Ерөнхийлөгч, УИХ-ын даргад танилцуулсан. ТЕГ-ын даргад зохион байгуулалттай нийгмийг доргиосон асуудал тараасныг шалгаж тогтоо гэдэг үүрэг өгсөн. Эрүүл мэндийн байгууллагынхан штабын зохион байгуулалттай явж байгаа. ЭМС-ын сайдын асуудлыг ирэх 7 хоногт оруулж ирж хэлэлцүүлнэ.

Н.Энх