Нийслэлийн АН нийслэлийн Сонгуулийн хороонд 2016 оны НИТХ-ын сонгуульд оролцохоо албан ёсоор илэрхийлж, мөрийн хөтөлбөр бусад баримт бичгүүдээ гардуулан өглөө. Нийслэлийн АН-ын дарга Э.Бат-Үүл сонгуулийн болон бусад хууль тогтоомжийг даган мөрдөн ажиллахаа хариуцлагатайгаар мэдэгдье гэв.
Нийслэлийн АН “5+Төлөвлөгөө” гэсэн мөрийн хөтөлбөртэйгээр 2016 оны НИТХ-ын сонгуульд оролцох юм байна. Энэ талаараа нийслэлийн АН-ын дарга Э.Бат-Үүл:
-Бид энэ удаагийн сонгуульд “5+Төлөвлөгөө” гэсэн мөрийн хөтөлбөртэйгээр оролцохоор сонгогч олондоо толилуулж байгаа. Өнгөрсөн 2012 онд Ардчилсан нам анх удаа нийслэлд олонх болж, нийслэлийн төлөө зүтгэх эрх, боломжтой болсон. 2012 онд бид амаргүй ажлыг хүлээж авсан. Эдийн засгийн орчин их муудаж, өсөлт саарсан байдалтай байсан. Нэн ялангуяа нийслэлд хур хог шиг болж бүтээгүй ажлууд хуралдаж, бий болсон байсан. 2012 онд бид “5А” гэсэн хөтөлбөртэй сонгуульд орж байсан.
Бид өнгөрсөн дөрвөн жилд хямралыг сөрж, зогссон. Хямрал ард иргэдийн ажил, амьдралыг аюулд хүргэхийн эсрэг сөрж зогссон, амаргүй ажлыг хийж ирлээ. Бид өмнөх үеэс 7-10 хувийн бага төсөвтэй ажилласан. Бас Төсвийн хуулиар нийслэлийн төсвөөс 200 тэрбум төгрөгийг халамж болон улсын төсвөөс дайчилж байсан асуудлуудыг шийдвэрлэхээр татаж авсан. Нийтийн тээврийн татаас, халамжийг нийслэл өг гээд 200 тэрбумыг дайчилсан. Ийм нөхцөлд бид иргэдийнхээ ажлын байрыг хадгалахын төлөө ажилалаа. Бид хямралын эсрэг бүтээн байгуулалтын “бослого” гаргасан.
Цаашдаа бид хямралын эсрэг сөрсөн үйл ажиллагаагаа улам өргөжүүлнэ. Одоо бид бүтээн байгуулалт, хөгжлийн шат руу явна. Нийслэлчүүд бидний дэмжинэ гэдэгт итгэдэг. Бид зовлон бэрхшээлийг ярилгүй нийслэлийн бүтээн байгуулалт хийж болдгийг өнгөрсөн дөрвөн жилд харуулж чадсан гэсэн мэдээллийг өгөв.
В.Бат