Итали улсад өнгөрсөн онд Хятад иргэд халдлагад өртөх, хулгайд эд зүйлээ алдах нь элбэгшсэн байна. БНХАУ-ын эрх баригчид иргэдээ хамгаалахын тулд хамтарсан хөтөлбөр гэгчийг санаачилжээ. Уг хөтөлбөрийн хүрээнд Хятадын цагдаагийн албан хаагчид Италийн Ром болон Милан хотноо эргүүл хийхээр болсон талаар “CNN” агентлаг мэдээллээ.

Хоёр долоо хоногийн хугацаанд Хятадын цагдаагийхан Италийн эргүүлийн цагдаа нартай хамтран ажиллах гэнэ. “Синьхуа” агентлаг “Хоёр долоо хоногийн хугацаанд хоёр хятад цагдаа эргүүлд гарна. Цагдаа нар үүргээ гүйцэтгэж дууссаны дараа Бээжинд ажлаа тайлагнах болно. Эргүүлийн арга хэмжээ бүтэн жил үргэлжилж магадгүй. Одоогоор эрх баригчид хугацааг тодорхой шийдвэрлээгүй байна” гэж мэдээлжээ.

Италид эргүүл хийх цагдаагийн нийт бүрэлдэхүүнийг өнгөрсөн оны эхээр сонгон шалгаруулж, зургаан сарын хугацаанд итали хэл заасан байна.

Б.Дэлгэрцэцэг