Монгол Улсад давхар иргэншлийг хуулиар хориглосон байдаг. Харин энэ хуулийг зөрчиж, төрийн болон улс төрийн алба хашиж байсан Д.Цэрэнчимэгийн тухай бид өмнө нь мэдээлсэн. Тэрбээр Монгол-АНУ-ын давхар иргэншилтэй гэдгээ нууж, Дорнод аймгийн Засаг даргаар ажиллаж, хууль тогтоомжийг ноцтой зөрчсөн гэдгийг бид өмнө нь дуулгасан. Тэгвэл Дорнод аймгийн Засаг дарга асан Д.Цэрэнчимэгийг АНУ-ын иргэн гэдгийг нь батлах баримт бидэнд олдсон юм. Тэр нь Цэрэнчимэг Баттерфиелдийг АНУ-ын иргэн болохыг баталсан паспорт.  

Америкийн бүртгэлийн алба 1964 оны 11 дүгээр сарын 30-нд Монголд төрсөн Д.Цэрэнчимэг нь иргэний хувьд АНУ-ын харьяалалтай болохыг нотлон, түүнд 456951363 дугаартай иргэний үнэмлэхийг 2009 оны 5 дугаар сарын 23-нд олгожээ. Үнэмлэхний хүчинтэй хугацаа нь 2019 оны 5 дугаар сарын 22-нд дуусгавар болох аж.

Түүнийг нотлох бусад зүйлсийг Калифорни муж улсын иргэний бүртгэлээс олов. Дамдинсүрэнгийн Цэрэнчимэг Баттерфиелд нь 2012 оны байдлаар Калифорни мужийн Окснард хотод Кортез гудамжны 3420 тоотод байнга оршин суух хаягтай байсан байна. Гэрийн утасны дугаар нь 80052008932. Тэрбээр нөхрийн хамт МонГлобал компанийг үүсгэн байгуулсан бөгөөд компанийх нь хаяг Лос Анжелос хотын Уилшир гудамжны 2139 тоотод үйл ажиллагаа явуулж байсан аж.

Энэ бүхэн Д.Цэрэнчимэгийг АНУ-ын иргэн гэдгийг хангалттай батална. Тэр мөн Монголын иргэний үнэмлэхтэй. Монголд бүртгэлтэй иргэний үнэмлэхээ ашиглан Сонгуулийн хууль, Төрийн албаны хууль болон бусад хууль тогтоомжуудыг ноцтойгоор зөрчиж Орон нутгийн сонгуульд оролцон, улмаар төрийн захиргааны алба хашиж байсан нь ийн ил боллоо.

Монгол Улсын харьяатын тухай хуулийн 4.1-д Монгол Улсын харьяат нэгэн зэрэг гадаад улсын харьяат байхыг хүлээн зөвшөөрөхгүй хэмээн заасан байдаг. Тэгвэл цагаан дээр хараар бичсэн хуулийн энэ заалтыг зөрчсөн Д.Цэрэнчимэгт ямар хариуцлага хүлээлгэх вэ?!

Дараагийн асуулт. Гадаадын иргэний эрх зүйн байдлын тухай хуулийн 8.1.3-д Гадаадын иргэнд Монгол Улсын нутаг дэвсгэрт улс төрийн үйл ажиллагаа явуулах байгууллага байгуулах, түүнд элсэн орох, хөрөнгө санхүүгийн дэмжлэг үзүүлэх зэргээр улс төрийн аливаа үйл ажиллагаа явуулахыг хориглоно хэмээн заажээ. Д.Цэрэнчимэг энэ хуулийг илт зөрчиж, АН-д элсч, Дорнод аймгийн Засаг даргаар ажиллаж, өдгөө тус аймгийн АН-ыг удирдаж байгааг юу гэж ойлгох вэ?!

Энэ бүх хууль бус үйлдлийг тагнуулын байгууллага, ИХШХЕГ мэддэг үү. Эсвэл мэддэг ч мэдээгүй царайлдаг байж болох. Эрх баригч намын гишүүнд хууль үйлчилдэггүй гэж хэн ч хэлээгүй.  

Саяхан УИХ-ын гишүүн С.Одонтуяа “Таныг Монголоосоо дайжихгүй гэдэгт итгэхийг хүсч байна” хэмээн бичиж, эх оронч сэтгэлтэй байхыг эрх мэдэлтнүүдээс хүссэн. Тэрбээр хөрөнгө мөнгөө, эд зүйлээ, сэтгэл зүрхээ эх орондоо байлгахыг уриалсан. Одоо харахад энэ уриалга АН-ынханд илүү хамаатай бололтой. АН-ын гишүүн Д.Цэрэнчимэг давхар иргэншлээ нууж, Монголын хуулийг гишгэж байна. Асуудал үүсвэл гараад зугтахад бэлэн гэсэн үг. Зугтсан нь ч байна. УИХ-ын гишүүн Х.Баттулгын хүн гэх Ч.Ганбат өдгөө АНУ-д тарвалзаж явна. Тэр Д.Цэрэнчимэг шиг мөн л давхар иргэншилтэй. АНУ-ын иргэн учраас Монголын хууль хяналтынхан яаж ч чадахгүй хүлээлтийн байдалтай байгаа.

Бас  Засгийн газрын хэрэг эрхлэх газрын дарга С.Баярцогтын гадаадад мартсан мөнгө. Эх орноо хятадын монгол хэмээн том “эндүүрч”, сая ам.доллараа мартаж орхисон түүнд С.Одонтуяа гишүүний уриалга илүү хамаатай. Тэгэхээр С.Одонтуяа гишүүн “Таныг Монголоосоо дайжихгүй гэдэгт итгэхийг хүсч байна” гэх үгээ намын нөхдөдөө хэлбэл байгаа илүү ононо.

Монгол Улс хууль тогтоомжтой. Тэрийг хүн бүр даган мөрдөх ёстой гэдгийг эрх баригч АН-ын гишүүдэд хэлэх нь илүүц биш бололтой. Тэр тусмаа иргэний харьяатын асуудлыг шийддэг Ерөнхийлөгч энэ асуудалд анхаарал хандуулах шаардлагатай байна.

В.Хэрлэн