Төрийн банк Говь-Алтай,Баянхонгор аймгийн төвүүдэд шинэ барилгуудаа ашиглалтад орууллаа

Монгол улсын хэмжээнд 540 салбар нэгжтэй Төрийн банкнаас 2.7 сая харилцагчиддаа бүтээгдэхүүн үйлчилгээгээ ОУ-ын стандартад нийцсэн, тав тухтай орчинд үзүүлэхийг зорин ажиллаж байгаа билээ. Энэхүү ажлын хүрээнд 2015 онд дөрвөн аймгийн төвд  банкны шинэ салбараа  ашиглалтад оруулсан бол 2016 онд мөн дөрвөн аймагт 1-1.4 тэрбумын хөрөнгө оруулалт хийж банкны стандартад нийцсэн барилгууддаа ашиглалтад оруулсаар байна.

2016 оны  3 сард Дорнод аймгийн төвд шинэ байраа ашиглалтад оруулсан бол 2016.04.30-нд Говь-алтай, 2016.05.01-ний өдөр Баянхонгор салбарын шинэ барилгуудыг хүлээн авч, нээлтийн арга хэмжээг зохион байгууллаа.  Нээлтийн арга хэмжээнд Төрийн банкны Бүтээгдэхүүн хөгжил хариуцсан дэд захирал Л.Жамбасүрэн, Үйл ажиллагаа хариуцсан дэд захирал Э.Мөнхсайхан нар оролцсон бол аймгийн ИТХ дарга болон аймгийн удирдлагууд, Говь-алтай, Баянхонгор салбарын Монгол банкны захирлууд, Төрийн банктай хамтран ажиллагч байгууллагуудын төлөөлөл оролцож хүндэтгэл үзүүлсэн юм.

Мөн Төрийн банкны шинэ салбарын нээлтэд зориулан Говь-алтай аймгийн Алтай театр, Баянхонгор аймгийн Хөгжимт театруудад Хурд хамтлаг бүрэн хэмжээний тоглолтоо зохион байгуулж Төрийн банкны Говь-алтай, Баянхонгор аймгийн харилцагчдад бэлэг барьлаа.

Ийнхүү Говь-алтай, Баянхонгор аймгийн харилцагчид тав тухтай орчинд банкны үйлчилгээ авах боломжтой болсон бол тун удахгүй Өвөрхангай, Орхон аймгуудад шинэ барилгынхаа ажлыг эхлүүлэхээр төлөвлөж байна.