Улс төрийн намууд аймаг, нийслэлийн ИТХ-ын сонгуульд нэр дэвшигдчээ тодруулах үйл ажиллагаагаа өнөөдрөөр дуусгавар болгох заалттай. Тиймээс ч намууд амралтын өдрүүдэд орон нутгийн сонгуульд нэр дэвшигчдээ бараг тодруулаад байна.
Нийслэлийн орон нутгийн сонгууль 45 мандаттай. Нийслэлийн АН өчигдөр хуралдаж, орон нутгийн сонгуульд нэр дэвшигчдээ тодруулсан байна. Үүнтэй зэрэгцээд орон нутгийн сонгуульд нэр дэвшүүлэх ханшийн асуудал хөндөгдлөө. Нийслэлийн АН-аас орон нутагт нэр дэвших ханш 50 сая төгрөг хүрсэн гэх мессэж явж байна. Харин нийслэлийн МАН-ынхан өнөөдөр хуралдах сурагтай.
Ямартай ч Сүхбаатар дүүрэгт АН-аас ИТХ-ын дарга Д.Баттулга, ХХБ-ны захирал Д.Хүрэлбаатар, Сүхбаатар дүүргийн Засаг дарга Д.Бадарсан, нийслэлийн Хөрөнгө оруулалтын асуудал хариуцсан орлогч С.Очирбат, тус дүүргийн ИТХ-ын дарга Б.Ган-Эрдэнэ болон н.Болормаа нар нэр дэвшихээр болжээ. Нийслэлийн Баянгол дүүргийн Иргэдийн төлөөлөгчийн хуралд УИХ-ын гишүүн С.Эрдэнэ хүргэн бэрүүдтэйгээ хамт өрсөлдлөө гэж шүүмжлэлд өртөж байсан. Тэгвэл энэ удаа хотын парламентын дарга ч түүний туршлагаас хуваалцах бололтой. Учир нь Сүхбаатар дүүргийн орон нутгийн сонгуульд нэр дэвшигч н.Болормааг ИТХ-ын дарга Д.Баттулгын бэр гэдгээр нь хотынхон андахгүй мэдэх аж. Ийнхүү хотын парламентын дарга Д.Баттулга бэрийн хамт Сүхбаатар дүүргийн ИТХ-ын сонгуульд хүч үзэх нь.
Харин Сонгинохайрхан дүүргийн АН-ын дарга Ө.Пүрэвбаатар 2016 оны НИТХ-ын сонгуульд дүүрэгтээ дэвших нэр дэвшигчидээ Нийслэлийн АН-ын Зөвлөлдөх хороогоор батлуулжээ. Тус дүүрэгт АН-аас нийслэлийн дэд бүтэц хариуцсан орлогч Н.Гантөмөр болон Л.Сайнтөгс, Д.Энхсайхан, Б.Мөнхгэрэл, П.Галиндэв, Ш.Одгэрэл, Ч.Бямбажав, М.Цэвээн-Очир, Ч.Бэлэгсайхан нар дэвших эрхээ авчээ.
Тэгвэл Сүхбаатар дүүрэгт МАН-аас “Капитал” банкны захирал Б.Ганбаатар, “Өгөөж чихэр боов” ХХК-ийн ерөнхий захирал С.Түмэнгэрэл, Сүхбаатар дүүргийн экс Засаг дарга А.Амарсайхан, тус дүүргийн МАН-ын хорооны экс дарга Ш.Төмөрбаатар, Сүхбаатар дүүргийн МАН-ын хорооны орлогч н.Мөнгөншагай, барилгын компанийн захирал н.Эрдэнэбаяр нар нэр дэвшин өрсөлдөхөөр болсон байна.
Ийнхүү нийслэлийн ИТХ-д намууд нэр дэвшигчээ эхнээсээ тодруулан батламжаад байгаа юм. Аймгууд ч ИТХ-ын нэр дэвшигчдээ тодруулжээ. УИХ-ын сонгуулийн хуулиас намын жагсаалтаар хасч, жижиг 76 тойрогт өрсөлдөхөөр баталсан. Үүнтэй холбоотойгоор УИХ-ын болон орон нутгийн сонгуульд нэр дэвших таамаглалд ч өөрчлөлт орж аж. Тухайлбал, аймаг, нийслэлийн Засаг дарга, ИТХ-ын дарга нар ихэвчлэн УИХ-ын сонгуульд нэр дэвших магадлалтай байсан. Сонгуулийн хуулийн өөрчлөлттэй холбоотой зарим нь орон нутагтаа нэр дэвшиж, жагсаалтад орох магадлалтай байсан эрхмүүдэд зайгаа тавьж өгсөн гэх явган яриа ч улс төрийн намуудад өрнөж байна.
Аймаг, нийслэлийн ИТХ-ын сонгуульд нэр дэвшигчид дэвшигчдийг энэ сарын 12-ны дотор харьяа СЕХ-нд бүртгүүлэх юм.
Н.Энхлэн