УИХ-ын гишүүн С.Ганбаатар цаг үеийн асуудлаар хэвлэлийн бага хурал хийлээ. Түүнийг ХҮН-аас гарч АН-д элсэн, нэр дэвшихээр болсон тухай сураг гарсан. Тэрбээр дээрх мэдээлэлд хариу тайлбар хийсэн юм. УИХ-ын гишүүн С.Ганбаатар:

-Өнгөрсөн долоо хоногт С.Ганбаатар миний биеийг том намуудад, бүлэглэлүүдэд орж байгаа гэсэн мэдээлэл цацлаа. МАНАН-д орсноос үхсэн минь дээр гэж хэлье. Тэр намууд С.Ганбаатарт хэрэгтэй биш. С.Ганбаатарт олон түмний итгэл найдвар хэрэгтэй. Түмний юмыг түмэнд нь зориулна. МАН, АН-ын олон шударга УИХ-ын гишүүн, улстөрчид байдаг. Олон зуун гишүүн, дэмжигчид байдаг. Тэд намайг хүндэлдэг. Би ч тэдний төлөө дуу хоолой болж зүтгэдэг. Гэхдээ МАНАН-гийн орой дээр байгаа хэдэн луйварчид өнөөдөр Монгол орныг минь маш хүнд байдалд оруулж, тусгаар тогтнол, газар нутгийг минь худалдаж байгаа. Ийм мэдэгдэл хийсний төлөө тэд гэмт хэрэгт холбогдуулна, сонгуульд оролцуулахгүй байх бүх арга хэмжээг авна. Хов хонзонгоор дүүрсэн МАНАН-гийн бүлэгт орно гэдэг сүнсээ худалдсантай адил юм даа. МАН, АН-ыг би эсэргүүцээгүй, орой дээр нь байгаа луйварчдын талаар ярилаа.

Би Дархан-Уул аймагт томилолтоор ажиллаж байгаа. Өнөөдөр мөн дахин явна.

-Та ямар намаас  нэр дэвших вэ?

-МАНАН-гийн эсрэг ард түмний төлөө зүтгэдэг ямар ч хүчинтэй эвсч, хамтарч, эвлэлдэж ажиллахад бэлэн байгаагаа илэрхийлж байна.

-Та АН-аас санал ирсэн тохиолдолд элсэх үү?

-АН, МАН-аас тодорхой яриа хэлцлүүд хийсэн байж болно. Хамгийн гол нь МАНАН-д орохгүй гэдгээ давтан хэлье. Үүнд АН, МАН аль аль нь орж байгаа. Мөрөөдлөөсөө үзэл бодлоосоо ухрахгүй.

-Ерөнхий сайд Ч.Сайханбилэг “Босоо С.Ганбаа хэвтээд өглөө” гэсэнд та ямар тайлбар хийх бол?

-Улстөрчийг босоо байх уу, хэвтээ байх уу гэдгийг Дубайн гэрээгээр ард түмнээ, улсаа худалдсан урвагч Ерөнхий сайд хэлдэггүй юм. Ард иргэд өөрсдөө шийддэг. Ч.Сайханбилэг, С.Ганбаатар хоёрын хэн нь босоо вэ гэдэг удахгүй тодорхой болно. Ч.Сайханбилэгийг надтай Дархан-Уул аймагт очиж өрсөлдөөч гэж уриалмаар байна.

-ХҮН-ын гишүүн хэвээрээ байгаа юу?

-ХҮН-ыг хөл дээр нь босгож, шинэ залуу хүмүүсийг улс төрд оруулна гэж хичээж чармайн зүтгэсэн. 76 дотроос хэн нэг нь шинэ хүмүүст тусалж байж УИХ-д гаргахгүй бол 18-хан хоног сурталчлаад гарч ирэхгүй. Харин ХҮН-ын Найдлаа нарын зарим залуус хэн нэгний хатгаас нөлөөлсөн үү, намайг УДШ дээр ХҮН-ын даргаар хоёр удаа бүртгээгүй. Тиймээс би ХҮН-ын жирийн гишүүн хэвээр байгаа.

-Та МАХН-наас нэр дэвших үү?

-Ямартай ч МАНАН-д орохгүй. Бусад эвслүүдтэй эвсч хамтрахад бэлэн.

Н.Энх