Аймаг, нийслэлийн ИТХ-д нэр дэвшигчид тодорлоо. Нийслэлийн ИТХ 45 мандаттай. АН, МАН болон бусад улс төрийн хүчнүүд өнгөрсөн өдрүүдэд нэр дэвшигчээ тодрууллаа. Энэ удаагийн орон нутгийн сонгуульд нэр дэвшигчдийн дунд өрсөлдөөн ширүүхэн явагдсан дуулдана. Ялангуяа хотын парламентыг сонгох сонгууль жилээс жилд хүчээ авч, өрсөлдөөн нэмэгдэж байгаа билээ.
Энэ удаагийн орон нутгийн сонгуульд Нийслэлийн АН-ынхан тэр дундаа нийслэлийн Засаг дарга бөгөөд Улаанбаатар хотын захирагч Э.Бат-Үүл УИХ-д бус орон нутгийн сонгуульд дахин багаа удирдан орж, ажлаа үргэлжлүүлэхийг зорьжээ. Нийслэлийн АН-ын дарга Э.Бат-Үүл өөрөө Хан-Уул дүүрэгт өрсөлдөхөөр нэр дэвшсэн байна. АН-аас орон нутгийн сонгуульд нэр дэвшигчдийн дийлэнхийг одоогийн баг бүрдүүлсэн байна. Тухайлбал, НИТХ-ын дарга Д.Баттулга, нийслэлийн хөрөнгө оруулалт хариуцсан орлогч С.Очирбат нар Сүхбаатар дүүрэгт, нийслэлийн дэд бүтэц хариуцсан орлогч Н.Гантөмөр Сонгинохайрханд, Нийслэлийн хөрөнгө оруулалтын газрын дарга Л.Нарантуяа Баянгол дүүрэгт, Нийслэлийн Засаг даргын орлогч Ц.Энхцэнгэл Баянзүрх дүүрэгт, ИТХ-ын төлөөлөгч Ц.Баатархүү Чингэлтэй дүүрэгт гэх зэргээр тус тус нэр дэвшсэн байна.
Гэр хорооллын дахин төлөвлөлт, барилгажилт, “Гудамж” төслийн хүрээнд замын өргөтгөл, хийж, гудамж талбайн тохижилт, хотын төвөөс гэр хорооллын гудамжинд гэрэлтүүлэг хийсэн гээд өнгөрсөн жилд нийслэлийн парламентынхан бүтээн байгуулалт өрнүүлснийг хэн ч үгүйсгэхгүй. Харин хэдэн төгрөгийн өртөгтэй төсөв байсныг хэд дахин өндөр үнээр нугалж хийсэн гэх талаарх яриа бол өөр асуудал. Уламжлалт баяр болон тэмдэглэлт өдрүүдээр зохиогддог Улаанбаатарын үдэш цэнгүүн зэрэгт тэрбум тэрбумаар нь мөнгө хөрөнгө төсөвлөж шамшигдуулсан, 7 сая төгрөгийн усан оргилуур 7 хонолгүй засварт орсон, гэр хорооллыг орон сууцжуулах хүрээнд төлөвлөгөөт зарим хэсэгт бүтээн байгуулалт саатсан гээд шүүмжлэл бас дагалддаг. Ямартай ч НИТХ-д дахин сонгогчдын итгэлийг авахаар нийслэлийн АН-ын дарга Э.Бат-Үүл багаа бүрдүүлэн орлоо.
Харин МАН-ын тухайд НИТХ-ын сонгуульд оюунлаг залуусаар багаа бүрдүүлсэн гэж онцолж байна лээ. Орон нутгийн сонгуульд нийслэлийн МАН-ын хорооны дарга Ц.Сандуй штабаа ахалж оролцоно. МАН сөрөг хүчин байсан өнгөрсөн жилүүдэд Ц.Сандуй байгууллага толгойлсон сайн менежер гэдгээ бусаддаа таниулсан. Ялагдсан намыг удирдаж хүнд байдлаас гаргасан төдийгүй түүнийг олон нийт хүмүүжил боловсролтой, чансаатай оюунлаг залуусын нэг гэж үздэг учраас намын хамт олон нь дэмжинэ гэж үзэж байгаа төдийгүй тэрбээр ийнхүү оюунлаг залуусаар багаа ч бүрдүүлж чадсанаараа намдаа үнэлэгджээ.
МАН-аас орон нутгийн сонгуульд нарийн бичгийн дарга Д.Амарбаясгалан, Монголын Оюун ухааны академийн захирал Х.Хатанбаатар, Токиогийн технологийн их сургуулийг төгсөгч, доктор Ц.Байгалмаа, “Торгоны зам” сан, “Монгол АйДи Групп” ХХК-ийн ерөнхий захирал М.Халиунбат, Монголын хуульчдын холбооны Гадаад харилцаа, хамтын ажиллагааны хэлтсийн дарга Ц.Арилдийпүрэв, Сонгинохайрхан дүүргийн Засаг даргын Тамгын газрын дарга асан С.Мөнхчулуун, Багануур дүүргийн засаг дарга асан Ц.Сандаг-Очир, Налайх дүүргийн МАН-ын хорооны дарга С.Амарсайхан, НИТХ-ын нарийн бичгийн дарга асан Ж.Батбаясгалан нарын чадварлаг залуус нэр дэвшээд байна. Тэд нийслэлийн бүтээн байгуулалтад гар бие оролцон, нийслэлийн иргэдийнхээ үзэл бодлыг төрийн түвшинд гаргаж ирэхээр бусад намын нэр дэвшигчтэй хүчээ үзэх юм.
Улс төрийн хоёр том АН, МАН-ын НИТХ-ын сонгуульд оролцох нэр дэвшигчид ийнхүү намаасаа батлахаа гардаад байгаа. Бусад улс төрийн хүчнүүд ч орон нутгийн сонгуульд нэр дэвшигчээ тодруулсан. Орон нутгийн сонгуульд нэр дэвшигчид СЕХ-нд маргаашийн дотор бүртгүүлэх юм.
Ямартай ч НИТХ-ын сонгуульд Нийслэлийн Засаг дарга Э.Бат-Үүлийн багийнхан болон МАН-ын залуусын хооронд хүчтэй өрсөлдөөн явагдахаар байгааг ажиглагчид онцолж байна лээ.
Н.Энх