Олон улсын эрэн сурвалжлах сэтгүүлзүйн нийгэмлэгийн цахим хуудаст Панамын баримт бичиг хэмээх  мэдээллийг олон нийтэд байрлуулсан. Уг мэдээлэлд манай улсын нэр нөлөө бүхий улстөрч, бизнесмэнүүд оффшор данстай  зарлагдсан билээ. Үүнтэй холбогдуулан Өргөдлийн байнгын хорооны дарга Ж.Батзандан мэдээлэл хийв. Тэрбээр:

-Өргөдлийн байнгын хорооноос АТГ-т хуулийн хэрэгжилт хянан шалгуулах тухай албан тоотыг өнөөдөр хүргүүлж байна. Энэ албан тоотод Авлигын эсрэг хуулийн 10.1, 10.2 дахь хэсэгт Авлигийн эсрэг хуулийн үйлчлэлд хамаарах этгээдүүд хөрөнгө, орлогын мэдүүлэг гаргах бөгөөд өөрийн болон гэр бүлийн гишүүдийн хөрөнгө, орлого, зээлийг  үнэн зөв мэдүүлэх үүрэгтэй гэж заасан.  УИХ-ын Хуульзүйн байнгын хороо 2012 оны 5 дугаа сарын тогтоолын хавсралтаар  баталсан “Албан тушаалтны хувийн ашиг сонирхлын мэдүүлэг болон хөрөнгө, орлогын мэдүүлгийн маягт”-ын 3.2.6-д хадгаламж, бэлэн мөнгө,  хувийн харилцах боло төлбөрийн данс, картын үлдэгдлийг мэдүүлэхээр заасан байгаа. Иймээс нийт төрийн албан хаагчид тэдгээрийн хамаарал бүхий этгээдүүдийн оффшор  дансны мэдээлэл, түүнд хадгалагдаж байгаа хөрөнгийн хэмжээг хөрөнгө орлогын мэдүүлэгт тусгасан байх шаардлагатай юм.

Энэ хуулийн дагуу бид улстөрчдийн болон тэдгээрт хамаарал бүхий хүмүүс оффшор дансны мэдээлэл ХОМ-т тусгасан эсэх, Монгол Улсын хуулийн дагуу татвараа төлсөн эсэх, хууль ёсны мөн эсэхийг тодруул гэдэг албан тоотыг АТГ-т хүргүүлж байна. АТГ хуулийн дагуу 14 хоногийн дотор хариу ирүүлнэ.

Панамын оффшор задарсантай холбоотой дэлхийн томоохон орнууд мөрдөн шалгах ажиллагаагаа эхлүүлсэн. Европын холбоо, Япон, Хятад  зэрэг томоохон орнууд оффшорт мөнгө нуусан албан тушаалтнуудаа шалгах, тайлбар мэдүүлэг авах ажлуудаа эхлүүлснээ зарлалаа. Монгол Улс ч гэсэн мөрдөн шалгах ажиллагаагаа эхлүүлэх ёстой гэдэг байр суурийг барьж байгаа. Энэ талаар чиглэл өгч байгаа хэмээлээ.

Мөн Оффшорын эсрэг хуулийн төслөө дахин мэдүүлэхээр болсноо УИХ-ын гишүүн Ж.Батзандан мэдээлсэн юм.

Н.Энх